Saparbaev Aqtóbedegi órtke qarsy kúres jónindegi jumystarǵa baǵa berdi
AQTÓBE. QazAqparat - Aqtóbede tótenshe jaǵdaılardyń aldyn alý jáne joıý jónindegi oblystyq komıssııanyń otyrysy ótti. Óńir basshysy Berdibek Saparbaev órtke qarsy jumystarǵa baǵa berdi, dep habarlaıdy QazAqparat tilshisi.
Aqtóbede tótenshe jaǵdaılar qyzmetiniń materıaldyq-tehnıkalyq bazasy kúsheıtiledi. Josparǵa sáıkes órt sóndiretin eriktilerdi daıyndaý, olardy arnaıy oqytý qarastyrylǵan. Bul jumystar tótenshe jaǵdaılarǵa qarsy jumystardyń jyldamdyǵyn arttyrýǵa, halyq qaýipsizdigin qamtamasyz etýge baqyttalǵan.
«Órtke qarsy kúres jumysyn qanaǵattanarlyqsyz dep esepteýge bolady. Óıtkeni adamdar qurban boldy. Qazir komıssııa Áıteke bı aýdanyndaǵy qaıǵyly oqıǵalardyń sebepterin anyqtap jatyr. Bul bárimiz úshin úlken sabaq bolýy qajet. Mundaı isterdiń qaıtalanýyna jol bermeýge tıistimiz», - dedi oblys ákimi Berdibek Saparbaev.
Sonymen qatar, tótenshe jaǵdaılardyń aldyn alý kezinde oblystaǵy barlyq qyzmetterdiń jumysyn úılestirýdi, aýdandardaǵy jedel shtab jumystarynyń tıimdiligin arttyrýdy, órt qaýiptiligi joǵary aımaqtarda ornalasqan eldi mekenderdi únemi baqylaýda ustaýdy tapsyrdy.
