Saparbaev Aqtóbedegi kartop tapshylyǵyna alańdady
AQTÓBE. QazAqparat - Aqtóbe oblysynyń ákimi Berdibek Saparbaev kartop baǵasyn baqylaýdy tapsyrdy. Qazirgi ýaqytta óńirdegi turaqtandyrý qoryna 370 tonna kartop saqtaýǵa jetkizildi, dep habarlaıdy QazAqparat tilshisi.
«Aqtóbe» áleýmettik-kásipkerlik korporatsııasy búgin 9 aıdy qorytyndylady. Turaqtandyrý qoryna azyq-túlik saqtaý, áleýmettik dúkender ashý jumysyn qolǵa alǵan korporatsııa qazir kókónis satyp alý jumystaryn júrgizip jatyr. Elimizdiń ońtústiginen kókónis tasymaldaǵandar qorǵa 370 tonna kartop, 45 tonna pııaz jetkizgen. Jergilikti sharýalar da óz ónimderin tapsyryp jatyr. Barlyǵy 32 mıllıon teńgege kókónis satyp alyndy. Qazirgi ýaqytta kókónister «Tabys» kommýnaldyq bazarynda jáne 22 áleýmettik dúkende satylyp jatyr.
«Kartop máselesi týyndady. Taıaý ýaqytta kartop baǵasy etten qymbat bolýy múmkin. Biz ózimizdi 100 paıyz kartoppen qamtamasyz ete alamyz, biraq bizde baǵa joǵary. Jyl ótken saıyn kókónis ósirý aýmaǵy keńeıip keledi, biraq tapshylyq áli bolyp otyr. Jıi aýyl sharýashylyǵy jármeńkesin ótkizý kerek. Jaqyn arada bári qalpyna kelýi tıis»,- dedi Aqtóbe oblysynyń ákimi Berdibek Saparbaev.
Jıyn kezinde kartop tapshylyǵynyń negizgi sebebi aıtyldy. Aqtóbe oblysy ákiminiń orynbasary Mavr Abdýllınniń aıtýynsha, Ózbekstan elimizdiń ońtústigi men Reseıdiń kartobyn ózine tasymaldap jatyr. Al Ózbekstannyń kókónisin ózge el satyp alýda.
«Olar buryn kókónisti shekara asyrýǵa shekteý qoıǵan bolatyn. Qazir bul shekteý joq. Sondyqtan kartoptyń bári sol jaqqa ketip jatyr»,- dedi M.Abdýllın. Esep boıynsha, qazir turaqtandyrý qoryndaǵy kartop áleýmettik dúkende kelisi 60-90 teńgeden satylyp jatyr.
