Saparbaev Aqtóbedegi áleýmettik nysandardyń qurylysymen tanysty
AQTÓBE. QazAqparat - Aqtóbe oblysynyń ákimi Berdibek Saparbaev qaladaǵy birneshe áleýmettik nysannyń qurylysymen tanysty. Qalada jazǵy lager, neke saraıy, Analarǵa taǵzym ortalyǵy salynyp jatyr, dep habarlaıdy QazAqparat tilshisi.
Aqtóbe qalasynda «Baqytty bala» jobasy aıasynda úzdiksiz jumys isteıtin «Artek» lageri salynyp jatyr. Lagerdegi oqý ǵımaraty kitap dızaınynda bolady. Taıaýda balalarǵa arnalǵan jatyn orynnyń qurylysy bastalady. Sebebi, lager jyl boıy jumys isteıdi. Munda balalar oqýyn jalǵastyryp, demalady; ózge zamandastarymen tanysyp, baılanys ornatady.
Óńir basshysy Berdibek Saparbaev aýmaqty abattandyrý jáne sándik-dekoratıvti bezendirý máselesine nazar aýdarýdy tapsyrdy.
«Oblys ákimi Berdibek Saparbaev qalany aralaý kezinde Neke saraıyn qarap shyqty. Qazirgi ýaqytta ǵımarattyń árleý jumystary aıaqtalyp keledi. Jalpy alańy shamamen 6000 sharshy metrdi quraıdy. Qala ákimi Іlııas Ispanov oblys basshysyna Aqtóbe qalasynyń ortalyq demalys saıabaǵy aýmaǵynda salynatyn ǵashyqtar alleıasy, orman jáne tarıhı aımaqtardy tanystyrdy. Keıin Berdibek Saparbaev «Analarǵa taǵzym» rýhanı-adamgershilik tárbıe ortalyǵynyń, múgedek balalarǵa arnalǵan ońaltý ortalyǵynyń jáne tennıs ortalyǵynyń qurylysy barysymen tanysty. «Analarǵa taǵzym» ortalyǵy Memleket basshysynyń «Rýhanı jańǵyrý» baǵdarlamasyn iske asyrý aıasynda salynýda. Keshende psıhologııalyq jeńildetý jáne keńes berý, qoldanbaly óner, jalpy damý, mýzykalyq bilim, stılıstıka jáne dızaın, otbasylyq trenıng jáne basqa da kabınetter jumys isteıdi. Ortalyqta otbasyndaǵy áıelderdiń rólin kúsheıtý, bolashaq analardy qazaq halqynyń salt-dástúrlerin eskere otyryp tárbıeleýge basa nazar aýdarylady», - dep habarlady oblys ákiminiń baspasóz qyzmeti.
Al balalardy ońaltý ortalyǵy bıznestiń áleýmettik jaýapkershiligi aıasynda boı kóteredi. Balalardy áleýmettik, psıhologııalyq jáne medıtsınalyq ońaltýǵa múmkindik bar. Qazirgi ýaqytta oblysta 3 myńnan astam múgedek bala tárbıelenip jatyr.
Aıta keteıik, oblys basshysy jaýapty memlekettik organdarǵa nysandar qurylysynyń ýaqtyly oryndalýy men sapasyn muqııat qadaǵalaýdy tapsyrdy.
