Saparbaev Aqtóbe vokzalyn bazarǵa aınaldyrmaýdy talap etti

AQTÓBE. QazAqparat - Aqtóbe vokzalyndaǵy dúkenderdi jabý jumysy jalǵasyp jatyr. Buǵan deıin oblys ákimi Berdibek Saparbaev tamaq pen usaq-túıek qajetti zattar, qýyrshaq pen áshekeı buıymdaryn, tipti, uıaly telefon satatyn dúkenderdi jaýyp, tek vokzaldyń naqty mindetin oryndaýdy tapsyrǵan bolatyn. Endi vokzal mańyndaǵy shaǵyn dúńgirshekterdi retteýdi qala ákimdigi men temirjolshylarǵa júktedi, dep habarlaıdy «QazAqparat» tilshisi.

Aqtóbe temir jolyndaǵy perronda, vozkal ishinde birneshe jeke kásipker ornyǵyp alǵan. Olar uzaq jyldar boıy azyq-túlik, áshekeı men tehnıka satyp otyr. Buǵan deıin qosymsha tabys taýyp, jolaýshylarǵa qyzmet kórsetýdi aqsatyp alǵan kompanııa endi baǵytyn ózgertedi. Vozkal ishindegi jáne vokzal mańyndaǵy qaýipsizdik pen tazalyqqa jaýapty «Qazaqstan temir joly» AQ jalǵa bergen oryndardy keri qaıtaryp jatyr.

«Halyq vokzal mańyndaǵy jaǵdaıdyń nasharlyǵyn aıtyp shaǵymdanady. Ol jerge XIX ǵasyrdyń úıshikterin qoıǵan. Oǵan eshkim qaramaıdy, byt-shyt. Masqara! Kúnine 32 poıyz ótse, árqaısysynda 150 jolaýshy bar. Olar ári-beri ótkende kóredi, salystyrady. Sondyqtan temir jolǵa talap qoıýymyz kerek. Halyqqa sapaly qyzmet kórsetýi shart. Eger órt, tótenshe jaǵdaı bolsa, jaǵdaı qıyn bolady. Jalǵa alýshylardyń jaǵdaıyn túsinemin. Jyldar boıy jumys istep, otbasyn asyrap otyr. Biraq biz úshin halyqtyń qaýipsizdigi basty orynda»,- dedi Berdibek Saparbaev.

Keıin óńir basshysy oblystyq basqarma basshylaryn, qalalyq ákimdiktiń jetekshi qyzmetkerlerin, vokzalǵa jaýapty qyzmetkerlerdi tyńdady.  Kólik prokýratýrasyna naqty tapsyrma berdi. «Basshylar poıyzben júrmeıdi, poıyzǵa minse, vokzalǵa basqa esikpen kiredi. Eger vokzalǵa kirgende, olar bul máseleni buryn shesher edi. Aýdan ákimderi de vokzaldy retke keltire almaı otyr. Qazir basym bóliginde 40-50 jyl buryn salǵan dúńgirshekter tur. Eshkim qarap jatqan joq. Áktep, syrlap, aǵash, gúl egýge bolady.  Ol  mádenıet», -  dedi Saparbaev.

Vokzaldaǵy bazar máselesi bıyl túbegeıli sheshiledi. Qazir 70 býtıktiń tek segizin qaldyryp, ózgelerin taratý jumysy júrgizilip jatyr.

«Jalǵa alýshylarmen kezdesý ótkilizip, másele sheshildi. Vokzal mańyna zertteý júrgizildi. Bizdiń oıymyzsha, avtoturaqty aqyly etý kerek. Sebebi, vokzal aldyndaǵy joldy kútý, tazalaý, baqylaýǵa qarjy kerek. Al qaýipsizdikti qamtamasyz etetin elektrondy baqylaý tehnıkasy óńirge jetkizildi. Shilde aıynda montajdaý jumysy bastalyp, iske qosylady », -  «QTJ» UK» AQ Aqtóbe fılıaly dırektorynyń vokzal sharýashylyǵy jónindegi bólim orynbasary Abaı Dosanov.

Aıta keteıik, Aqtóbe oblysy aýmaǵynda 33 temir jol vokzaly bar. Kún saıyn 32 baǵyt boıynsha poıyz júredi.

Altynaı Saǵyndyqova