Saparbaev Aqtóbe oblysy óndiristerinde jaraqat alý deńgeıi qalaı tómendetiletinin aıtty
ASTANA. QazAqparat - Aqtóbe oblysynda 20 kásiporyndy tehnologııalyq jańǵyrtý esebinen óndiriste jaraqat alý deńgeıi 10 paıyzǵa tómendetilmek.
Bul týraly Ortalyq kommýnıkatsııalar qyzmetindegi baspasóz máslıhatynda oblys ákimi Berdibek Saparbaev málim etti, dep habarlaıdy QazAqparat.
Oblys ákimi óńirde kásiporyndardy jetildirýge arnalǵan «Jol kartasy» bekitilgenin, onyń aıasynda aımaqta 15 óndiris jańǵyrtylǵanyn, olardyń qatarynda «Voshod-Oriel» JShS, «KMK Munaı» AQ, Aqtóbe ferroqorytpa zaýyty, «Energosıstema» JShS, «AHQZ» AQ jáne basqa da óndirister engenin atap ótti.
Ústimizdegi jyldyń aıaǵyna deıin taǵy 5 nysan boıynsha tehnologııalyq jetildirý jumystary aıaqtalady. 20 kásiporynnyń tehnologııalyq jańǵyrtylýynyń jalpy quny 20 mlrd teńgeni quraıdy. Bul shara eńbek ónimdiligin 9 paıyzǵa arttyrady, ónimniń ózindik quny men qaıta óńdeý shyǵyndaryn 3 paıyzǵa, jaraqattaný deńgeıin 10 paıyzǵa tómendetedi, sondaı-aq ekologııalyq jaǵdaıdy jaqsartady jáne jańa jelilerdi iske qosý arqyly shyǵaratyn ónimderdiń túrlerin keńeıtedi.
Aldaǵy bes jylda oblystyń kásiporyndarynyń jabdyqtar men úderisteri keminde 400 mlrd teńgege jetildiriledi.
