Saparbaev Aqtóbe qalasyndaǵy sý tasqynyna qarsy kúres jumystarymen tanysty
AQTÓBE. QazAqparat - Aqtóbe oblysynyń ákimi Berdibek Saparbaev tótenshe jaǵdaılar qyzmetimen birge ótken jyly sý tasyǵan aýmaqtardy qarap shyqty. Qazir ózen arnalary keńeıtilip, tabany tazartylyp jatyr, dep habarlaıdy QazAqparat tilshisi.
Aldymen Jaman Qarǵaly ózenine bardy. Munda ózen arnasyn tazartý, keńeıtý, kópir salý jumystary júrip jatyr.
«Sońǵy eki táýlikte bir aılyq mólsherde qar jaýdy. Biraq bul sý tasqynynyń qaýpi kúsheıdi degen sóz emes. Osy aptada kúndiz kún jyly, al tún aıazdy dep boljam jasaldy. Bul óte tıimdi. Oblysta sońǵy 2-3 jylda kóp jumys atqaryldy. Bógetter salynyp, aryqtar tazartylyp jatyr. Óńirde 2700-ge jýyq adam qutqarý jumystaryna daıyn. Tehnıka da tekserildi. Ótken jylǵy jaǵdaı qaıtalanady nemese qaıtalanbaıdy dep kesip aıtý múmkin emes»,- dedi Aqtóbe oblystyq tótenshe jaǵdaılar departamentiniń bastyǵy Baýyrjan Syzdyqov.
Búgin tasqynnyń aldyn alý jumystary kezinde Peschanka ózenindegi kópirdiń daıyndyǵy qaraldy. Bul jerde de ózen arnasy tazartylyp, keńeıtildi. Degenmen ózen boıynda gaz qubyry ótip jatyr. Eger qaýip tónip, sý deńgeıi kóterilse, bul jerde gaz qysymy azaıtylyp, taǵy da ózen arnasy keńeıtiledi, jaǵasy bekitiledi. Ári sý júrgen kezde kópir mańy táýlik boıy kúzetiledi. Al Aqtóbe qalasy, Qarǵaly aýyldyq okrýgindegi kópirde de baılanys symy bar.
«Bárin tazalap, retke keltirse, sý tasymaıdy. Al jóndelmese bári bolýy múmkin. Bir apta ýaqytta kópir mańyndaǵy baılanys symyn buryp, ózen arnasyn tazartýǵa, keńeıtýge múmkindik berý kerek»,- dedi oblys ákimi Berdibek Saparbaev.
Aıta keteıik, Aqtóbe qalasynda óndiris orny salǵan kópir buzylyp jatyr. Sonymen qatar, Jińishke ózeniniń arnasy tazartylyp, bekitilýde. Munyń bári ótken jyly sý tasqyny kezinde qıyndyq týǵyzǵan kópir, arnalarǵa jatady.
