Saparbaev «Aqtóbe» fýtbol klýbynyń ujymymen kezdesti
AQTÓBE. QazAqparat - Aqtóbe oblysynyń ákimi Berdibek Saparbaev búgin Ortalyq stadıonǵa baryp «Aqtóbe» fýtbol klýbynyń ujymymen kezdesti. Óńir basshysy balalar men jasóspirimder fýtbolyn damytýdy tapsyrdy, dep habarlaıdy QazAqparat tilshisi.
«Aqtóbe» fýtbol klýby alǵashqy eki oıyndy jastar quramasymen ótkizdi. Tyıym salynǵan soń legıonerlerge de, basty oıynshylarǵa da alańda oryn bolmady. Bul aralyqta jastar ózderiniń tabandylyǵyn kórsetip, qarsylas komandaǵa gol soqty. Búgin óńir basshysy Berdibek Saparbaev «Aqtóbe» FK basshylyǵymen jáne jattyqtyrýshylar quramymen kezdesip, aqtóbelik oıynshylardyń nátıjesine óz pikirin bildirdi. Jıynǵa klýbtyń bas dırektory Samat Smaqov, bas jattyqtyrýshy Vladımır Mýhanov, jastar quramasynyń aǵa jattyqtyrýshysy Valerıı Alemaskın, «Aqtóbe-Jas» klýbynyń bas jattyqtyrýshysy Igor Prochnıtskıı qatysty.
«Bizdiń jastarymyz Aqtóbede fýtbol oıyny bar ekenin kórsetti. Sizdiń mindetińiz - birlikti saqtaý, komandanyń jaýyngerlik rýhyn kóterý, jankúıerlerdiń úmitin aqtaý úshin kúsh biriktirý. Klýb jumysyndaǵy ashyqtyqty, tazalyq jáne tártipti qamtamasyz etý mańyzdy. Óz kezeginde, aımaq basshylyǵy sizge jan-jaqty qoldaý kórsetýdi jalǵastyrady», - dedi óńir basshysy Berdibek Saparbaev.
Oblys ákiminiń baspasóz qyzmetiniń habarlaýynsha, S.Smaqov, V.Muhanov, V.Alemaskın, I.Prohnıtskıı jańa oıynshylardy tirkeýge tyıym salý shekteýin alýǵa kómektesken óńir basshysyna alǵysyn bildirdi.
Sonymen qatar, Qazaqstan chempıonatynyń birinshi lıgasynda Aqtóbe usynatyn «Aqtóbe-Jas» komandasyn qurý kezinde ákimdik qoldaý kórsetetin boldy. Ári memlekettik organdarǵa «Aqtóbe» fýtbol klýbymen birge barlyq qarjylyq máselelerdi sheshýge, klýbtyń ınfraqurylymyn jáne materıaldyq-tehnıkalyq bazasyn jaqsartýǵa, Aqtóbe fýtbol mektebiniń tárbıelenýshilerinen kásibı oıynshylardy daıyndaýǵa tapsyrma berdi.
Kezdesýde aımaqtaǵy balalar men jasóspirimder fýtbolyn damytý mindetteldi.
