Saparbaev: «Aqtóbe» fýtbol klýbynyń bankrotqa ushyraýyna jol bermeımiz
AQTÓBE. QazAqparat -Aqtóbe oblysynyń ákimi Berdibek Saparbaev «Aqtóbe» fýtbol klýbynyń oıynshylarymen, jattyqtyrýshylarymen kezdesti, dep habarlaıdy QazAqparat tilshisi oblys ákiminiń baspasóz qyzmetine silteme jasap.
«Aqtóbe» fýtbol klýbynyń oıynshylar aldyndaǵy qaryzy artyp, óńir basshysy aldymen klýbdyń bas dırektory Samat Smaqovpen kezdesken bolatyn.
Al búgin kezekti oıynǵa daıyndalyp jatqan komandamen kezdesý úshin ortalyq stadıonǵa baryp, klýbtyń bankrotqa ushyraýyna jol bermeıtinin jetkizdi.
«Aqtóbede fýtbol bolǵan, bolady da. Biz Sizderge barynsha qoldaý kórsetemiz. Árıne, klýbtyń problemalyq suraqtary joq emes, biraq biz olardy sheship jatyrmyz. Bastysy bıylǵy jyly eńbekaqy men syıaqy boıynsha qaryz joq. «Bankrotqa ushyrady» degen qaýesetke senýdiń qajeti joq. Oınańyzdar jáne oıyndaryńyzben jankúıerlerińizdi qýantyńyzdar», - dedi oblys ákimi Berdibek Saparbaev.
Kezdesý kezinde 2017 jyldyń qaryzy túgel óteletini, al odan buryn jınalǵan qaryzdar boıynsha zań aıasynda sheshim shyǵarylatyny jetkizdi. Al bas jattyqtyrýshy Vladımır Muhanov oıynshylar tek erteńgi saıysta ǵana jeńip qoımaı, kelesi oıyndarda da jankúıerlerin qýantý úshin bar kúshterin salatyndaryna sendirdi.
«Kezdesýde balalar men jasóspirimder fýtbolyn damytý týraly da sóz boldy. 2016 jyly Aqtóbede fýtbol akademııasy ashylǵan bolatyn. Bıyl oblys ortalyǵynda bes fýtbol alańy bar arnaıy sport bazasy paılanýǵa berildi. Kezdesý sońynda oblys ákimine óńirdiń avtomobıl kodyn bildiretin «04» nómirli fýtbolka tartý etildi»,- dep habarlady oblys ákiminiń baspasóz qyzmeti.
Aıta keteıik, erteń «Aqtóbe» óz alańynda «Shahterdi» qabyldaıdy. Fýtbol klýbynyń jaǵdaıyna alańdaǵan jankúıerler de arnaıy esepshot ashyp, qarjy jınaýǵa kóshti. Jankúıerler árbir 1 myń teńgeniń mańyzdy ekenin aıtyp, esepshotqa 50 myń teńge aýdaryp jibergen qarapaıym fýtbol janashyrlaryn jarııalap jatyr. Sonymen qatar, jergilikti kásipkerlerden qıyn kezde kómektesýdi surady.
