Saparbaev: Aqtóbe birde-bir Olımpıada chempıonyn tárbıeleı almady
AQTÓBE. QazAqparat - Aqtóbe oblysynyń atynan shyqqan Ermahan Ibraımov 2000 jyly Sıdneıde chempıon bolsa, ótken jyly Farhad Harkı qola júldeger atandy. Eki sportshy da Aqtóbe jerinde jattyǵý jasamady. Bul týraly Aqtóbedegi sport federatsııalarynyń jıynynda aıtyldy, dep habarlady QazAqparat tilshisi.
Aqtóbe oblysynyń ákimi Berdibek Saparbaev búgin olımpıadalyq jáne olımpıadalyq emes sport túrleri boıynsha federatsııalardyń basshylarymen kezdesti. Óńirde sporttyń 62 túri tirkelgen eken. Onyń 25-i olımpıadalyq, ózgesi olımpıadalyq emes sport túri. Qazir 44 sport túri boıynsha federatsııa jumys istep tur. Biraq nátıje tym tómen. Aqtóbedegi sportty damytýdyń jolyn izdegen oblys ákimi Berdibek Saparbaev oblystyq dene shynyqtyrý jáne sport basqarmasynyń basshysy Nurlybek Júsipovten esep aldy.
«Olımpıada, Álem, Azııa birinishilikterinde aqtóbelik sportshylardyń kórsetkishi óte nashar. Oblysta 44 sport túri boıynsha federatsııa jumys istep tur. Meniń oıymsha, oblystyq dene shynyqtyrý jáne sport basqarmasy óz aldyna, federatsııalar óz aldyna júr. Federatsııalar tyrbańdap birnárse uıymdastyrady, sport basqarmasyna jalynyp, aqsha suraıdy. Jarys ótedi, basqarma federatsııany umytady. Bulaı bolmaıdy? Biz «sportty damytý úshin ne isteýimiz kerek?» degen suraqqa jaýap izdeýimiz kerek. Qarap otyrsaq, Aqtóbe oblysynda kásibı sporttyń damýy tómendep barady. Muny nátıjege qarap aıtyp otyrmyz. Máselen, 25 jylda Qazaqstan 6 olımpıadaǵa qatysqan eken. Onda Aqtóbede tárbıelengen birde-bir sportshy joq. Farhad Harkı syrttan ákelingen»,- dedi oblys ákimi Berdibek Saparbaev.
Aıta keteıik, Aqtóbelik 9 sportshy olımpıadalyq sport túrleri boıynsha Qazaqstan quramasyna kirgen. Barlyǵy 4 sport túri boıynsha jattyǵyp júr.
«Buqaralyq, ózge de sport túrin damytý kerek. Biraq olımpıadalyq sport túri bizdiń bedelimizdi arttyrady. Óńirde boks, kúrestiń kórsetkishi tómendedi. Fýtbolǵa da mıllıardtaǵan qarjy bólinip jatyr. Nátıje ońdy emes. Sebebi, bizde sportshylardyń rezervi joq. Jattyqtyrýshylardyń jumysy tómen. Syrtta júrgen aqtóbelik sportshylar men jattyqtyrýshylardy shaqyr dep aıttyq. Biraq ol tapsyrma oryndalyp jatqan joq»,- dedi B.Saparbaev.
Kezdesý kezinde óńir basshysy sporttyq jarystardy uıymdastyrǵanda olardyń kórermenine mán berýdi tapsyrdy. Sebebi, taıaýda jasóspirimder arasynda fýtboldan halyqaralyq týrnır ótip, oǵan óte az kórermen jınalǵan.
