Saparbaev AÁK taǵaıyndaǵanda qajetsiz qujattar suraıtyn mamandar bar ekenin moıyndady

NUR-SULTAN. QazAqparat - Ataýly áleýmettik kómek rásimdeý úshin uzyn-sonar kezekke turyp, asyǵystyq tanytýdyń qajeti joq. Bul týraly búgin Úkimet otyrysynan keıingi baspasóz máslıhatynda QR Eńbek jáne halyqty áleýmettik qorǵaý mınıstri Berdibek Saparbaev aıtty, dep habarlaıdy QazAqparat tilshisi.

«Nur-Sultandaǵy birneshe jumyspen qamtý ortalyǵyna barǵanymdy ózderińiz de kórgen shyǵarsyzdar. Ókinishke oraı alǵashqy kúnderi, ásirese, birinshi onkúndikte kezek boldy. Biz birneshe márte barlyǵynyń birden barýynyń qajeti joq ekendigin aıtqan da edik. Qujattardy taǵaıyndaý jáne qabyldaý onyń sáýirdiń 20-ynda álde 29-ynda tapsyrylǵanyna qaramastan bir aı boıy júrgiziledi», - dedi ol.

Sonymen qatar Berdibek Saparbaev ataýly áleýmettik kómekti taǵaıyndaý barysynda tek jeke kýálik qana qajet etiletindigin basa aıtty.

«Qajetsiz qujattardy talap etýge qatysty aıtar bolsam, ókinishńke oraı ondaı mamandar bar. Alaıda, biz birneshe márte tek jeke kýálik talap etiletindigin aıtqan edik. Degenmen, ózim barǵan kezimde mundaı keleńsizdikterdi anyqtap, jumyspen qamtý ortalyqtarynyń basshylyǵyna, ákimdikterge olardyń qajetsiz qujattardy talap etpeýin tapsyrdyq», - dedi mınıstr.