Saparbaev 13 úıdiń shóbi órtenip ketken aýyldyń turǵyndarymen kezdesti
AQTÓBE. QazAqparat - Aqtóbeniń Qosestek aýylyndaǵy mal azyǵyn órtegen tórtinshi kúdikti ustaldy. Bul týraly oblystyq polıtsııa departamentiniń bastyǵy M.Abısatov oblys ákimi Berdibek Saparbaevqa aıtyp berdi, dep habarlaıdy QazAqparat tilshisi.
Aqtóbe oblysynyń ákimi Berdibek Saparbaev Qarǵaly aýdanyna jumys sapary kezinde qasaqana órtten zardap shekken Qosestek aýylynyń turǵyndarymen kezdesti. Óńir basshysy oqıǵa bastalǵan kúni isti óz baqylaýyna alǵanyn jetkizdi.
«Arnaıy top qurylyp, jumys jasap jatyr. Onyń quramyna prokýratýra, polıtsııa, jergilikti atqarýshy organdardyń ókilderi kirdi. Aýdan ákimdigi men demeýshiler barlyq zardap shekkenderge materıaldyq kómek kórsetti. Osyǵan kináli jandar Qazaqstannyń zańnamasyna sáıkes jazasyn alatyn bolady. Sondaı-aq, jekelegen polıtsııa qyzmetkerlerin jaýapkershilikke tartý máselesi qaralady», - dep sendirdi oblys ákimi Berdibek Saparbaev.
Oblys ákiminiń baspasóz qyzmetiniń habarlaýynsha, Qosestektegi kezdesýde Polıtsııa departamentiniń bastyǵy Mahambet Ábısatov tórt kúdikti ustalǵanyn baıandady. Tergeý amaldary jalǵasyp jatyr. Kezdesý sońynda aýyldyqtar kórsetilgen materıaldyq kómek pen qoldaý úshin alǵystaryn bildirdi.
Eske salsaq, Aqtóbe oblysy Qarǵaly aýdany Qosestek aýylynda belgisiz bireýler shópti kezekpen órtep, keıbirine «kezek sende» dep úshbý hat tastap ketken bolatyn.
Keıin jergilikti ákimdik arnaıy tergeý toby qurylǵanyn málimdep, zardap shekken adamdarǵa kómek kórsetilip jatqanyn habarlady.
Tergeý jumystary kezinde arnaıy top qurylyp, aýyldaǵy 1500-den astam turǵynmen jumys júrgizildi. Tergeý nátıjesinde aldymen úsh adam ustaldy.
