Sapaly zańdardy ýaqytyly qabyldaýymyz qajet – Máýlen Áshimbaev
«Búgin Memleket basshysy Qasym-Jomart Toqaev jańa parlamenttik maýsymnyń kezekti sessııasyn ashyp, halyqqa Joldaýyn jarııalady. Joldaýda el damýynyń basym baǵyttary men aldaǵy maqsat-mindetteri belgilengen. Bıylǵy Joldaý respýblıkalyq referendýmda halyqtyń qoldaýyna ıe bolǵan konstıtýtsııalyq reformalardy iske asyrýǵa, sondaı-aq elimizdiń áleýmettik-ekonomıkalyq damýyn qamtamasyz etýge baǵyttalǵan. Ekonomıkany júıeli túrde ártaraptandyrý, halyqtyń ál-aýqatyn arttyrý, saıası júıeni ári qaraı reformalaý baǵyttarynda jańa bastamalar kóterildi», - dedi M. Áshimbaev búgingi Senat otyrysynda.
Senat tóraǵasy bul bastamalardyń jańa Qazaqstandy qurýǵa arnalǵan naqty qadamdar ekenin atap ótti.
«El múddesi jolynda strategııalyq sheshimder de qabyldanýda. Parlamentke de birqatar zańnamalyq mindetter júkteldi. Kóterilgen máselelerdi iske asyrý úshin aldaǵy ýaqytta aýqymdy jumystar atqarý qajet. Senat belgilengen basymdyqtardy zańnamalyq turǵydan qamtamasyz etý úshin keshendi jumys júrgizýge daıyn. Bul bizdiń basty mindetimiz. Sol sebepti biz sarapshylar qaýymdastyǵymen, qoǵamdyq ınstıtýttarmen jáne basqa da múddeles taraptarmen birlesip, belsendi jumys isteýimiz qajet. Májilispen jáne Úkimetpen birge sapaly zańdardy ýaqytyly qabyldaýdy qamtamasyz etýimiz kerek.
Sondaı-aq sizder parlamenttik kanıkýl kezinde óńirlerge, shalǵaı aýyldarǵa baryp, halyqpen kezdestińizder. Sol kezdesýlerde kóterilgen máseleler palatanyń osy sessııadaǵy jumysynda jan-jaqty eskerilýi qajet. Ózderińiz kórip otyrǵandaı, aldymyzda aýqymdy jumystar tur. Sessııa barysynda bárimiz birigip, osy baǵyttarda nátıjeli jumys isteımiz dep senemin», - dedi Máýlen Áshimbaev.
