Sapaly oqýlyqtar ázirleý úshin baspalarǵa jaýapkershilik kúsheıdi
Baspasóz qyzmetiniń málimetterine qaraǵanda, respýblıkalyq ǵylymı-praktıkalyq bilim mazmunyn saraptaý ortalyǵy habarlaǵandaı, endi polıgrafııalyq aqaý, sondaı-aq pándik saraptama komıssııasy bekitken nusqadan aýytqý nátıjesinde ketken qateler men basqa da kemshilikter anyqtalǵan jaǵdaıda, oqýlyqtar men oqý ádistemelik keshenderdi baspa óz esebinen aýystyrýǵa mindetti.
«Biz mundaı quqyqtyq norma arqyly barlyq taraptardyń ózara jaýapkershiligin kúsheıtý mekteptegi oqý ádebıetiniń sapasyn arttyrýǵa oń áser etedi dep sanaımyz», – deıdi ortalyq basshysy Eldos Nurlanov.
Esterińizge sala keteıik, sońǵy úsh jylda QR Oqý-aǵartý Mınıstrligi memlekettik saraptama rásimderiniń obektıvtiligin arttyrýǵa, sarapshylarǵa, avtorlarǵa jáne oqýlyqtarǵa qoıylatyn talaptardy naqtylaýǵa baǵyttalǵan birqatar zańnamalyq sharalar qabyldady.
«2020 jyly saraptama júrgizý protsesi tolyǵymen qupııalyq rejımge aýystyryldy. Mınıstrlik saıtynda pdf jáne epub formatyndaǵy qaǵaz oqýlyqtardyń elektrondyq nusqalary ashyq ornalastyrylyp, avtorlar kórsetilmeıtin boldy. Bul saraptamanyń ádildigi men ashyqtyǵyn qamtamasyz etetinin shara. Sondaı-aq baspalarǵa ishki saraptama júrgizý, avtorlardyń oqý ádebıetterin ázirleýdiń ádisnamasy, olardy baǵalaý krıterııleri boıynsha oqytý kýrsynan ótkizý jaýapkershiligi júkteldi»,-delingen habarlamada.
Foto: gov.kz
