Sapaly qyzmet - jolaýshy qaýipsizdiginiń kepili
ASTANA. 26 mamyr. QazAqparat - Qazirgi ýaqytta elimizdegi jolaýshylar vagonynyń tapshylyǵy 450 birlikti quraıdy.
Bul týraly QR Kólik jáne kommýnıkatsııa mınıstrliginiń baspasóz qyzmeti taratqan aqparatta aıtylǵan.
Vedomstvonyń atap ótýinshe, demalys maýsymy men jazǵy kanıkýldyń bastalýymen temir jol kóligindegi jolaýshylar aǵyny birneshe esege artty. Sonyń sebebinen atalǵan kezeńdegi aıtarlyqtaı ózekti másele tasymaldaý úderisiniń qaýipsizdigin qamtamasyz etý, sondaı-aq jolaýshylarǵa servıstik qyzmet kórsetý bolyp otyr.
Qazirgi ýaqytta respýblıkada barlyǵy úsh myńnan astam jolaýshylar poıyzy tirkelgen. Soǵan qaramastan búgingi kúni jolaýshylar vagonynyń tapshylyǵy shamamen 450 vagondy quraıdy. Sonymen qatar, jolaýshylarǵa servıstik qyzmet kórsetý deńgeıiniń jetkiliksizdigi, jolaýshylar vagony parkiniń sanıtarlyq-tehnıkalyq jaı-kúıiniń nasharlyǵy sııaqty problemalar da bar. 2010 jyly jazǵy maýsymda ǵana QR Kólik jáne kommýnıkatsııa mınıstriniń blogyna jolaýshylar poıyzyndaǵy servıstik qyzmet kórsetý máseleleri, jolaýshylardy, bagajdy jáne júk bagajyn tasymaldaý erejesi talaptarynyń oryndalmaýy, sondaı-aq poıyz brıgadalarynyń ózderine júktelgen laýazymdyq mindetterin oryndamaıtyny týraly azamattardan shamamen 100 ótinish kelip tústi.
QR temir joldaryn tehnıkalyq paıdalaný erejesi talaptaryna sáıkes jolaýshylar poıyzynyń quramyna jolaýshylardy tasymaldaýdyń tıisti talaptaryna saı emes jeldetkishtiń aqaýy bar vagondardy engizýge tyıym salynady. Alaıda, jazǵy tasymaldaý kezeńinde tasymaldaýshylar joǵaryda kórsetilgen erejelerdiń belgilengen talaptaryn oryndamaıtyny jıi kezdesetin jaǵdaılar. 2010 jylǵy jazǵy kezeńde kóliktik baqylaý organdary júrgizgen tekserister kezinde aýany kondıtsıonerleý júıesiniń jumys istemeıtin shamamen 40 vagondy jáne órt kezinde dabyl berý júıesi joq nemese múlde jumys jasamaıtyn 174 vagondy paıdalaný anyqtaldy.
Aǵymdaǵy jyly Almaty-Qostanaı qatynasyndaǵy №43 jolaýshylar poıyzy quramynda elektr jabdyqtarynyń aqaýy saldarynan qozǵalys kezinde vagonnyń janý, Aqtóbe-Almaty qatynasyndaǵy №34 jolaýshylar poıyzy quramyndaǵy vagonnyń relsten shyǵyp ketý faktileri oryn aldy. Mundaı oqıǵalar ekonomıkalyq shyǵyndardy bylaı qoıǵanda jolaýshylardyń ómiri men densaýlyǵyna tikeleı qaýip tóndiredi.
Jazǵy tasymaldardyń bastalýyna baılanysty QR Kólik jáne kommýnıkatsııa mınıstrligi Kóliktik baqylaý komıtetiniń tóraǵasy Ádilet Barmenqulov jolaýshylar poıyzdarynda servıstik qyzmet kórsetý deńgeıin arttyrý, sondaı-aq temir jol kóligimen jolaýshylardy tasymaldaý qaýipsizdiginiń sapasyn arttyrýǵa baǵyttalǵan naqty is-sharalardy iske asyrýdy tapsyrdy.
Atap aıtqanda kóliktik baqylaý organdary jeke menshik tasymaldaý kompanııalarynyń qaýipsizdik talaptaryn muqııat saqtaý jáne kólik qyzmetin kórsetý kezinde servıstik qyzmet kórsetý sapasyna tekserý júrgizýdi josparlaýda. Onyń ishinde jolaýshylar vagondaryn jóndeý jáne tehnıkalyq qyzmet kórsetý jónindegi tehnologııalyq úderisterdi saqtamaý faktilerin joıý tapsyryldy.
Atalǵan is-sharalar Qozǵalys qaýipsizdigi, Jolaýshylar tasymaly monıtorıngi departamentteri jáne «Qazaqstan temir joly» ulttyq kompanııasy» AQ Vagon sharýashylyǵy departamenti ókilderiniń qatysýymen búkil respýblıka boıynsha aldaǵy aı boıy ótkiziletin bolady.
