«Sapaly Qazaqstan» keshendi jospary ázirlensin - Úkimet basshysy
ASTANA. QazAqparat - Búgin Úkimettiń selektorlyq rejimdegi otyrysynda QR Premer-Mınıstri Baqytjan Saǵyntaev Indýstrııa jáne ınfraqurylymdyq damý mınıstrligine "Sapaly Qazaqstan" keshendi josparyn ázirleýdi tapsyrdy, dep habarlaıdy QazAqparat tilshisi.
"Indýstrııa jáne ınfraqurylymdyq damý mınıstrligi Densaýlyq saqtaý, Aýyl sharýashylyǵy mınıstrlikterimen jáne "Atameken" UKP-men birge 2019 jyldyń ortasyna deıin "Sapaly Qazaqstan" keshendi josparyn ázirlep, qabyldasyn. Onda halyqaralyq deńgeıge sáıkes keletin qazaqstandyq standarttardy, tehnıkalyq reglamentter men normalardy 3 jyl ishinde engizýdi, zamanaýı zerthanalyq bazany damytýdy eskersin", - dedi B.Saǵyntaev.
Sonymen qatar Úkimet basshysy Aqparat jáne kommýnıkatsııalar mınıstrligine Nazarbaev Ýnıversıtetimen birge aldyńǵy qatarly ǵylymı-tehnologııalyq kompanııalardy ekojúıeni, onyń ishinde Astana bıznes-kampýs pen Astana halyqaralyq ІT-startaptar tehnoparkin odan ary damytýǵa strategııalyq áriptes retinde tartýdy pysyqtaýdy tapsyrdy.
