Sapaly kartop syrtqa satylyp, sórede Qytaıdyń sapasyz ónimi qalǵany ras pa – mınıstrlik jaýaby

ASTANA. KAZINFORM – Saýda jáne ıntegratsııa mınıstrligi Saýda komıteti tóraǵasynyń orynbasary Ernur Jáýtikbaev dúken sórelerindegi kartoptyń sapasy týraly synǵa jaýap berdi.

- Turaqtandyrý qorlarynyń aıasynda 87 myń tonna kartopqa kelisimshart jasalǵan. Qazirgi tańda Qazaqstan boıynsha 50 myńnan astam kartop qory bar. Sapa týraly aıtsaq, qazir maýsymdar arasyndaǵy ólara kezeń ekenin ózderińiz túsinýlerińiz kerek. Qyrkúıek aıynda jınap alǵan kartoptyń saqtaý merzimi bar. Búginde onyń belgili bir deńgeıde tómen sapada bolýy - tabıǵı jaǵdaı. Sórege ónim túskennen keıin adamdar iriktep alyp ketedi. Bálkim, sizdiń tanystaryńyz barǵan kezde irikteýden qalǵan kartopqa tap bolǵan shyǵar. Dúken ákimshiligi assortımentti jańartyp úlgermegen de bolýy múmkin, - dep túsindirdi Ernur Jáýtikbaev. 

Mınıstrlik ókili qazaqstandyq fermerler ósirgen sapaly kartoptyń bári syrtqa satylyp, ishki naryqta Qytaıdyń sapasyz ónimi ǵana qalǵan degen ýájderge de jaýap berdi.

- Eksport pen ımport degen árdaıym bolǵan. Qazirgi álemde ımport pen eksporttyń teńgerimi degen bar. Tipti ózińiz aıtyp otyrǵan qytaı kartobyn satyp alǵannyń ózinde óz tańdaýyńyzǵa baılanysty. Ózińizge qaısysy qolaıly, sony alasyz. Jalpy kartop sapasyna jaýapty bizden basqa memlekettik organdar bar. Solarǵa júgingen jón, - dep qaıyrdy ol. 

Eske salsaq, 28 qańtardan bastap Qazaqstan aýmaǵynan úshinshi elderge kartop shyǵarýǵa tyıym salynǵan edi.