Sapa artpaı jolaqy eshqashan kóterilmeıdi - Baýyrjan Baıbek
ALMATY. QazAqparat - Almaty ákimi halyqpen esepti kezdesýinde jolaqysy kóteriledi degen qaýesetke qatysty núkte qoıdy, dep habarlaıdy QazAqparat tilshisi.
Baýyrjan Baıbektiń aıtýynsha, bıyl jańa avtobýs alǵan tasymaldaýshylarǵa 15 mlrd teńge kóleminde demeýqarjy bólmek. Bul qarjyǵa 255 myń adamnyń jeńildikpen júrýi qamtamasyz etiledi.
«Qazir Almatyda avtobýs parki 30%-ǵa jańarǵan. Biraq keıbir tasymaldaýshylar 80 teńgeni az kórip, 150 teńgege kóterý kerek dep jatyr. Olar jolaqysyn kótermekshi, biraq tasymaldaý sapasyn arttyrýǵa nıetti emes. Ondaı tasymaldaýshylarmen jeke jumys jasaımyz. Sapany kótermeıinshe, jolaqysy qymbattamaıdy», - dedi Baýyrjan Baıbek.
Qala ákimi «shyǵynǵa jumys jasap jatyrmyz» degen tasymaldaýshylar aqshany kúrep kelgenin aıtty.
«Sonda sizderdiń qyzmetkerlerińiz 5 jyl boıy shyǵynǵa jumys jasap kelgen be? Aqylǵa syımaıdy. Naryqtyń kólemi 20 mlrd teńge ekenin bildik. Endi kez kelgen tasymaldaýshy nesıe ala alady. Jol júrý aqysy qazir Almatyda metro úshin 71,3 teńge, al avtobýstarda 80 teńge. Qalǵan aıyrmany 4 mlrd teńge kóleminde demeýqarjy jabady», - dedi B.Baıbek.
