Sap túzegen sarbazdarymyzǵa júkteler mindettiń júgi qashanda aýyr – Máýlen Áshimbaev
«Barshańyzdy Otan qorǵaýshy kúnimen jáne Qazaqstan Qarýly Kúshteriniń qurylǵanyna 30 jyl tolýymen quttyqtaımyn! Aıbyndy armııa jáne antyna adal jaýynger – elimizdiń tiregi, eldigimizdiń kepili. Memlekettiliktiń myzǵymas qamaly sanalatyn osy ekeýi myǵym bolsa, beıbit aspan men turaqty damý qamtamasyz etiledi. Sondyqtan sap túzegen sarbazdarymyzǵa júkteler mindettiń júgi qashanda aýyr», - dep jazdy Senat Tóraǵasy Facebook paraqshasynda.
Onyń atap ótýinshe, qazirgi tańda Memleket basshysy Qasym-Jomart Kemeluly Toqaevtyń bastamasymen armııany damytý jáne onyń jaýyngerlik tıimdiligin arttyrý baǵytynda aýqymdy jumys qolǵa alynyp jatyr.
«Bul – qoǵamnyń keshegi «Qańtar oqıǵasynan» keıingi talap-tilegine jáne búgingi geosaıası syn-qaterlerge jaýap retinde jasalǵan mańyzdy qadam. Osy baǵyttaǵy jańa basymdyqtar áskerimizdiń áleýetin kúsheıtip, aıbarly armııa qalyptastyrýǵa tyń serpin beretini sózsiz. Biz batyr babalarymyzdyń búgingi izbasarlary erlik rýhyn árdaıym asqaq qalpynda saqtaıdy dep senemiz. Otan qorǵaý degen abyroıly mindetti arqalaǵan azamattarymyzdyń mártebesi bıikteı bersin. Qarýly Kúshterimiz qýatty, el irgesi berik bolsyn! Merekemen quttyqtaı otyryp, ár otbasyna qýanysh, bereke, amandyq tileımin. Táýelsiz Qazaq eli jasaı bersin!», - dedi Máýlen Áshimbaev.
