Sanjar Tashkenbaı Ispanııadaǵy týrnırde chempıon atandy

ASTANA. KAZINFORM - Qazaqstandyq boksshy Sanjar Tashkenbaı (50 keli) Ispanııanyń La-Nýsııa qalasynda ótip jatqan Boxam Elite-2026 týrnırinde top jardy. 

Fınalda otandasymyz ıspanııalyq Ismael Magraýı Frıamen qolǵap túıistirdi. Jekpe-jek tóreshilerdiń biraýyzdan sheshimimen qazaqstandyq bylǵary qolǵap sheberiniń basymdyǵymen aıaqtaldy. Ekinshi raýndta Sanjardyń qarsylasy nokdaýn alyp qaldy. Osylaısha ol 2026 jyldy jeńispen bastady.

Otandasymyz jartylaı fınalda da ıspanııalyq Karlos Dıasty qapy qaldyryp ketti.
Sanjar Tashkenbaı 2003 jyly 1 maýsymda dúnıege kelgen. 2023 jyly álem chempıony atansa, 2022 jyly Azııa chempıonatynda jeńis tuǵyryna kóterildi.

Ol 2025 jyly World Boxing aıasyndaǵy álem kýbogynda chempıon atandy.

Aıta ketsek, el quramasynan Ýmıda Sadyqova (80 keliden joǵary) altyn alsa, Nazerke Serik (65 keli) pen Panar Seıithanqyzy (80 keliden joǵary) kúmis júldeger atandy.

Elimizdiń erler quramasy úshin halyqaralyq týrnır — Nurjan Nasanovtyń jetekshiligimen ótip jatqan alǵashqy jarys. Ol jyl basynda Qaırat Sátjanovty almastyrǵan edi.

Buǵan deıin Sanjar Táshkenbaıdyń Ispanııadaǵy týrnırde fınalǵa shyqqanyn jazǵanbyz.