Sanjar Táshkenbaı bokstan Azııa chempıonatynyń fınalyna joldama aldy

ASTANA. KAZINFORM – Taıland koroldiginiń Chıangmaı qalasynda erler jáne áıelder arasynda bokstan ótip jatqan Azııa chempıonatynda Sanjar Táshkenbaı fınalǵa shyqty.

Álem jáne Azııa chempıony Sanjar Táshkenbaı 48 kelige deıingi salmaqta japonııalyq Kadzýma Aratakemen qolǵap túıistirdi.

Bul olardyń birinshi kezdesýi emes, 2022 jyly Iordanııa astanasy Amman qalasynda ótken Azııa birinshiliginde fınalda Sanjar K.Aratakeni tóreshilerdiń biraýyzdan sheshimimen jeńip, chempıon atanǵan edi.

Bul joly birinshi raýndta-aq Sanjar qarsylasyn nokdaýnǵa jiberdi. Ekinshi kezeńde de esep ózgergen joq – 5:0. Qorytyndy esep – 5:0.

Osylaısha, Sanjar Táshkenbaı erler arasynda qazaq boksshylarynan alǵashqy bolyp fınalǵa joldama aldy.

Eske sala keteıik, budan buryn bokstan Azııa chempıonatynda Gúlsaıa Erjannyń ózbekstandyq qarsylasyn jeńip, fınalǵa shyqqanyn jazǵan bolatynbyz.

Sondaı-aq Azııa chempıonatynda 10 qazaqstandyq boksshy fınal joldamasyn sarapqa salady.