Sanjar Boqaevtyń soty: sýdıa qatysýshylar men BAQ ókilderine eskertý jasady
ASTANA. KAZINFORM — Almaty qalasynyń Almaly aýdandyq sotynda «QazTransGaz» UK» AQ basshysynyń burynǵy keńesshisi Sanjar Boqaevqa qatysty qylmystyq is qaralyp jatyr, dep habarlaıdy Kazinform agenttigi.
Sýdıa Janat Ábenova sot otyrysyna qatysýshylarǵa sot zalyndaǵy tártipti túsindirip, sot tóreligine qandaı da bir qysym kórsetýge jol berilmeıtinin eskertti.
Sýdıanyń aıtýynsha, sot otyrysynyń ashyqtyǵyn saqtaý maqsatynda BAQ ókilderi men tyńdaýshylarǵa arnalǵan arnaıy zalda tikeleı translıatsııa uıymdastyrylǵan. Ol dybys-beınejazba jáne fototúsirilim tártibi QR Qylmystyq-protsestik kodeksiniń 345-babymen retteletinin aıtty. Sot zalynda uıaly telefon arqyly ózge jazba jasaýǵa jáne translıatsııa júrgizýge tyıym salynady.
Janat Ábenova sot bıliginiń táýelsizdigin atap ótip, sottyń tek Konstıtýtsııa men zańǵa baǵynatynyn eskertti. Sondaı-aq iske qatysty BAQ pen áleýmettik jelilerde jarııalanǵan pikirler men baǵalaýlar sotqa qysym kórsetý retinde qarastyrylatynyn málimdedi.
Sýdıa jýrnalıster men áleýmettik jeli qoldanýshylaryn sot protsesin jarııalaýda jaýapkershilik tanytyp, tekserilmegen aqparat pen arandatýshy málimdemelerdi taratpaýǵa shaqyrdy. Onyń aıtýynsha, mundaı jarııalanymdar qoǵamda iske qatysty birjaqty kózqaras qalyptastyrýy múmkin.
Sonymen qatar sot otyrysyna qatysýshylar men tyńdaýshylarǵa tártip buzyp, sýdıanyń talabyna baǵynbaǵan jaǵdaıda zaldan dereý shyǵarylatyny, sotty qurmettemegeni úshin QR Qylmystyq-protsestik kodeksiniń 346-babyna sáıkes jaýapqa tartylatyny eskertildi.
Eske sala keteıik, Sanjar Boqaev bıyl naýryzda ustalyp, birqatar qylmys jasady degen kúdikke ilindi. Oǵan qatysty qylmystyq is Qylmystyq kodekstiń 190, 188, 218, 340 jáne 274-baptary boıynsha qaralyp jatyr.
