Sanjar Boqaev qamaýǵa alyndy
ASTANA. KAZINFORM — Sot ony eki aı merzimge kúzetpen ustaý túrindegi bultartpaý sharasyn sanktsııalady. Bul jóninde QR Bas prokýratýrasy málimdedi.
Vedomstvonyń habarlaýynsha, Boqaev isine qatysty tergeý eki bap boıynsha júrip jatyr. QR QK-niń 190-baby 4-bóligi 2-tarmaǵy, ıaǵnı «Asa iri mólsherde jasalǵan alaıaqtyq» — oǵan taǵylǵan aıyptardyń biri. Sonymen qatar QR QK-niń 340-baby 3-bóligi 1-tarmaǵy, ıaǵnı «Adamdar toby nemese aldyn ala sóz baılasý arqyly adamdar toby jasaǵan, aǵashtar men butalardy zańsyz kesý, joıý nemese zaqymdaý» aıyby da taǵylǵan.
— 2026 jylǵy 19 naýryzda Almaty qalasy tergeý sotynyń qaýlysymen S. Boqaevqa qatysty eki aı merzimge kúzetpen ustaý túrindegi bultartpaý sharasy sanktsııalandy, — delingen Bas prokýratýra málimdemesinde.
Aıta keteıik buǵan deıin Sanjar Boqaev ustalǵanyn jazǵanbyz.
Ol jalǵan aqparat taratý jáne qoǵamda teris pikir qalyptastyrý maqsatynda áleýmettik jelilerde jekelegen tulǵalardyń qoǵamdyq saıabaq aýmaǵynda aǵashtardy zańsyz kesýi jáne qurylys nysandarynan múlik urlaýy týraly beınematerıaldardy ornalastyrdy degen kúdikke ilindi.
Tergeý derekterine sáıkes, Sanjar Boqaev atalǵan qylmystardy uıymdastyryp, qarjylandyrǵan. Ol úshin tabysy tómen adamdardy tartyp, olarǵa aqshalaı syıaqy berý arqyly aǵash kesý men urlyq jasaýǵa tapsyrma bergen.
Sondaı-aq, ol asa iri mólsherde qarjy qarajatyn alaıaqtyq jolmen jymqyrdy degen kúdikke ilinip otyr.