Sanjar Ádilov polıtsııaǵa shabýyl jasaý faktilerine qatysty pikir bildirdi
ASTANA. KAZINFORM — QR Іshki ister mınıstriniń orynbasary mundaı jaǵdaıda Qylmystyq kodekstiń 380-baby, ıaǵnı «Bılik ókiline qatysty qorqytý nemese kúsh kórsetý áreketteri» boıynsha jaýapkershilik qarastyrylǵanyn aıtady.
— Qostanaıda 380-baptyń, 6-bólimi boıynsha úsh kúdikti ustaldy. Atyraýda jáne Óskemende de kúdiktiler osyndaı aıyppen quryqtaldy. Atalǵan eki qalada polıtseıler qyzmet barysynda soqqyǵa jyǵyldy. Al Qostanaıda tártip saqshysy azamattarǵa qyzmetinen tys ýaqytta eskertý jasap, shabýylǵa ushyraǵan. Kúdikti ustaldy. Qazir tergeý júrip jatyr, — dedi Ádilov.
Polıtseılerdi sabaǵandar sot sanktsııasymen qamaýǵa alyndy.
Sondaı-aq Іshki ister mınıstriniń orynbasary jurttyń polıtsııa qyzmetkerlerine degen kózqarasy jóninde aıtty.
— Polıtsııa jumysyna qatysty halyq oń pikirde. Qoǵam «Zań men tártip» ıdeologııasyn tolyqtaı qoldap otyr. Bul ustanymnyń negigzgi baǵyttarynyń biri — quqyq buzýshylyqtardyń aldyn alý jáne ashý. Atap ótkimiz keletin jaıt — elde quqyqtyq mádenıet joǵary deńgeıde. Polıtseılerge qarsy kúsh qoldaný boıynsha biren-saran fakti tirkelip, kúdiktiler qylmystyq jaýapkershilikke tartyldy. Jalpy, barlyq iste sońǵy núkteni sot tóreligi qoıady, — dedi ol.
Aıta keteıik, buǵan deıin Óskemende polıtseıdiń qarýyn tartyp alyp, oq atqan kúdiktiler ustalǵanyn habarlaǵanbyz.
Sondaı-aq polıtseılerge qarsy zańsyz áreketter úshin qandaı jaýapkershilik qarastyrylatynyn jazǵanbyz.
