Sańyraýqulaq terýge shyqqan rýdnyılyq áıeldiń máıiti tabyldy
QOSTANAI. QazAqparat – Rýdnyı qalasynda 47 jastaǵy áıeldiń ólimine qatysty tergep-tekserý amaldary júrgizilýde, dep habarlaıdy QazAqparat oblystyq polıtsııa departamentiniń baspasóz qyzmetine silteme jasap.
Oqıǵa 13 qazan kúni bolǵan. Er adam polıtsııaǵa júginip, 47 jastaǵy qyzynyń joǵalyp ketkenin aıtqan. Kelesi kúni qalalyq polıtsııanyń kezekshi bólimine orman alqabynan bir áıeldiń denesi tabylǵany týraly habarlama kelip túsken. Oqıǵa ornyn jedel tergeý toby jumyldyryldy.
«Medıtsınalyq-saýyqtyrý ortalyǵy aýmaǵyndaǵy butalardyń arasynan zorlyqpen óltirilgen áıeldiń denesi tabyldy. Qylmysty ashý úshin arnaıy jumys toby quryldy. Polıtsııa jábirlenýshiniń tanystarynan jaýap alyp, qajetti jedel is-áreketterin júrgizdi. Nátıjesinde kisi ólimine jábirlenýshiniń dosy men onyń jubaıynyń kináli ekeni anyqtaldy», - dedi Rýdnyı qalasynyń polıtsııa bólimi bastyǵynyń orynbasary Rýslan Álimanov.
Іs derekterinde kórsetilgendeı, úsheýi sańyraýqulaqty terýge shyqqan. Olar orman alqabynda ishimdik ishken.
«Er adam jubaıynyń ketkenin paıdalanyp, 47 jastaǵy áıelge pyshaq jumsaǵan. Jábirlenýshi dene jaraqattary saldarynan oqıǵa ornynda kóz jumdy. Kúdikti kóz jumǵan áıeldiń kıimderin órtep, baǵaly zattaryn ózimen alyp ketken», - dedi Rýslan Álimanov.
Jedel-izdestirý sharalary barysynda polıtsııa qyzmetkerleri kúdiktini Mendiqara aýdany Volodarovka aýylynan ustady. Ol 25 jasta.
Atalǵan fakti boıynsha QR QK 99-babymen («Adam óltirý») sotqa deıingi tergeý amaldary júrgizilýde. Kúdikti ýaqytsha ustaý ızolıatoryna qamaldy.
