Sańyraý ári mylqaý jigit sirińke shyrpysynan meshit turǵyzdy
ASTANA. 27 naýryz. QazAqparat - Ahmet Ibragımov esimdi daǵystandyqtyń kókiregi saırap turǵanymen, ózgeler sekildi ishtegi sherin aqtaryp, syryn aıta almaıdy,
qustardyń saıraǵan únin, sýdyń syldyry men japyraqtardyń sybdyryn estı almaıdy.
Sóıtse de, sańyraý ári mylqaý osynaý jigit ómirden óz ornyn tapty, dep habarlaıdy muslim.kz.
Mine, úsh jyldyń júzi boldy, armany asqaq, qııaly ushqyr Ahmet sirińke shyrpysy men kádimgi qaǵaz jelimimen ózgeshe óner týyndylaryn jasaıdy.
Birde ol shyrpy men tis shuqyǵyshtan úı «turǵyzǵan» adam týraly fılmdi kórip, oıǵa qalady. Meshittiń nusqasyn jasap kóredi. Onyń bul týyndysy dostary men týǵan-týystarynyń kóńilinen shyǵady. Sodan bastap, ol qolónerdiń bul túrimen túpkilikti aınalysady. Jasaǵandaryn satyp, tabys ta tabady. Onyń ónerinen habary bar bylaıǵy jurttyń tapsyrysyn oryndaýdan qoly tımeıtin boldy. Ol óz týyndylarynyń ishinde Mekkedegi meshittiń shaǵyn kóshirmesin «eń úzdik jumysym» dep esepteıdi.
Ahmet bul meshitti jasaýǵa 10 táýlik ketkenin aıtty. Ony jasaýǵa 20 qorap tis shuqyǵysh, 50 qorap sirińke shyrpysyn jáne qaǵaz jelimniń 5 flakonyn paıdalanǵan.
