Sany bar, sapasy joq – Aımaǵambetov mekteptegi kompıýterler jaıly

NUR-SULTAN. QazAqparat – Bilim jáne ǵylym mınıstri Ashat Aımaǵambetov statıstıka men kórsetkishter «báıgesiniń» saldarynan mektepterdegi kompıýterlerdiń eskirip bara jatqanyn málim etti, dep habarlaıdy QazAqparat tilshisi.

«Búgingi kúni statıstıkaǵa súıensek, mektepterde kompıýter kóp sekildi kórinedi. Biraq olardyń sany bar, sapasy joq. Óıtkeni kompıýterdiń kóbi eski. 2000-2005 jyldary alynǵan kompıýterler de bar. Biraq olar eshqaıda syzyp tastap, jiberilmeıdi. Nelikten? Óıtkeni bizge statıstıka men kórsetkishterge súıený kerek. Sondyqtan zańnama boıynsha bes jyldyq merzimdi ǵana qarastyryp, bekitsek jón bolady. Bes jyldan beri qoldanylyp júrgen kompıýterlerdi qarap, eskilerin statıtıstıkaǵa qospaýymyz kerek. Ondaı kózboıaýshylyqtyń eshkimge keregi joq», - dedi Ashat Aımaǵambetov Bilim jáne ǵylym mınıstrliginiń apparattyq otyrysynda.

Mınıstr sonymen qatar mektepterge Wi-fi qosý jumysy da baıaý júrgizilip jatqanyn jetkizip, máseleni baqylaýǵa alýǵa tapsyrdy.

Aıta ketsek, buǵan deıin Ashat Aımaǵambetov mektepterge ınternet qyzmetin qosatyn provaıderlerdiń qyzmetin synǵa alǵan bolatyn. Mınıstrdiń aıtýynsha, mektepterge ınternet qyzmetin qosatyn provaıderdiń tarıfi óte qymbat.