Santa-Klaýs Astana aspanynan ushyp ótti
ASTANA. 25 jeltoqsan. QazAqparat - 24 jeltoqsan kúni Soltústik polıýsten ushyp shyqqan vırtýaldy jańajyldyq aıaz ata buǵylar jegilgen arbada álemdik týrne jasaýda.
Santa-Klaýs Reseıdiń Alys Shyǵysyna, Jańa Zelandııaǵa, Avstralııaǵa, Okeanııaǵa, Japonııaǵa, Indonezııaǵa, Fılıppınge, Soltústik jáne Ońtústik Koreıa men Qytaıǵa óziniń syılyqtaryn berip úlgerdi.
Dúısenbi kúni túnge jaqyn jańajyldyq sıqyrshy Qazaqstannyń eki qalasy - Astananyń sondaı-aq Qaraǵandy oblysynyń Qarsaqbaı eldi mekeniniń aspanymen ushyp ótti. Bul týraly AQSh pen Kanadanyń Áýe shabýylyna qarsy qorǵaný birlesken komandovanıesiniń «Tvıtterdegi» paraqshasyna silteme jasap Tengrinews saıty jazdy. Olar Santanyń saıahatyn tek radarlarmen jáne spýtnıktermen ǵana emes, arnaıy Santa-kameralarmen jáne joıǵysh ushaqtarmen baqylaıdy.
Sheteldik vırtýaldy Aıaz atanyń týrnesi 25 jeltoqsan kúni Astana ýaqyty boıynsha túski saǵat birde aıaqtalady. Osy ýaqytta ol ǵalamshardyń barlyq balalaryn quttyqtaý úshin barlyq qurlyqtar men elderdiń iri qalalarynda bolady.
NORAD saıtynda jarııalanǵan málimetterge súıensek, Santa-Klaýstyń shanasynyń uzyndyǵy 150 kámpıtten, jalpaqtyǵy 80 kámpıtten turady, al salmaǵy 110 kámpıttiń salmaǵyna para-par. Bul rette, oǵan 117 kelilik júk pen ondaǵan tonna syılyq tıelgen.
"NORAD Santany baqylaıdy" jobasy 1955 jyly bastaldy. Ol kezde Kolorado shtatyndaǵy iri dúkenderdiń biri balalarǵa Santa-Klaýsqa telefon soǵý týraly úndeý tastap, jarnama ornalastyrdy. Biraq, habarlamada kórsetilgen telefon nómirinde qatelik ketip, balalar Áýe shabýylyna qarsy qorǵaný qurlyqtyq birlesken komandovanıesiniń (NORAD-tyń negizin qalaýshy) shuǵyl jelisiniń operatoryna qońyraý soǵa bastady.
