Sansyzbaı Esilov sol jaǵalaýdyń qurylysy «aıqaı-shýmen» bastalǵanyn aıtty
ASTANA. QazAqparat - Astana qalasynyń eń birinshi ákimi Ádilbek Jaqsybekovtiń orynbasary bolǵan, qazirde qalalyq ardagerler keńesiniń tóraǵasy Sansyzbaı Edilov elordanyń sol jaǵalaýy qalaı salynǵanyn eske saldy, dep habarlaıdy QazAqparat tilshisi.
Sansyzbaı Esilov óziniń esteligin Astana qalasynyń ákimdiginde ótken saltanatty jıynda aıtyp berdi.
«Osynda otyrǵan sizderge Qazaqstannyń elordasy ózgergen kezdegi qıyn da qýanyshty sátterdi eske salaıyn. Bul osydan 19 jyl buryn edi. Memleket basshysyna baılanysty bir epızod esimde qalypty. 1999 jyldyń aıaǵy 2000 jyldyń basy bolýy kerek. Sol kezde ákim bolǵan Ádilbek Ryskeldiuly jınalystardy únemi keshke ótkizetin. Jyl sońyna qaraı keshke jaqyn ol (Astananyń alǵashqy ákimi - Á.Jaqsybekov) orynbasarlaryn jınady da, «men jańa ǵana Prezıdenttiń qabyldaýynan shyqtym. Prezıdent menen «jańa Astanamyzdy salatyn ýaqyt kelgen tárizdi» dep surady. Árıne, ol kezde eski qalanyń problemasy kóp edi: qala turǵyndaryna jylý jetpeıtin, apta saıyn jylý qubyrlary jarylatyn, qala adamdary kúni boıy sýsyz otyrǵan kezder boldy. Sondyqtan, sol jınalysta orynbasarlardyń barlyǵy biraýyzdan jańa qalaǵa qarsy shyǵyp, aldymen eski qalany rettep alaıyq dedik. Kelesi kúni Ádilbek Ryskeldiuly sál ashýly kóńil-kúımen kelip, qol astyndaǵylarǵa eskertý jasady da Nursultan Nazarbaevtyń jańa qala salý týraly nyq tapsyrmasyn jarııa etti. Bizge Elbasynyń ózi qolmen syzǵan «Báıterek» monýmentiniń úlgisin usyndy»,-dep eske aldy S.Esilov.
Sózin aıaqtaı kele Sansyzbaı Esilov Astanaǵa quıylǵan ınvestıtsııa qazir on eselep qaıtyp jatqanyn atap ótti.
