Sanremo Junior án baıqaýynyń jeńimpazdary Italııaǵa joldama alady

ASTANA. KAZINFORM — Sanremo Junior Kazakhstan ekinshi ulttyq baıqaýy 20-22 aqpanda Aqtóbe qalasynda ótedi. 

Óner dodasynda top jarǵan ónerpazdar 26 naýryzda Italııanyń Sanremo qalasynda ótetin áıgili SANREMO JUNIOR XVI Halyqaralyq balalar baıqaýyna joldama alady. Oǵan 26 eldiń 6-15 jastaǵy daryndary qatysady.

Ulttyq irikteý Astanadaǵy Óner akademııasynyń qoldaýymen ótedi. Ol - Italııada baıqaýdy ótkizetin «KISMET» kompanııasynyń Qazaqstandaǵy resmı ókili.

Sonymen qatar baıqaý Italııanyń Qazaqstandaǵy Elshiligi men Aqtóbe qalasy ákimdiginiń qoldaýymen uıymdastyrylyp otyr. 

Ulttyq baıqaýda Qazaqstannyń barlyq óńirinen 55 qatysýshy baq synaıdy. 

22 aqpanda ótetin Gala-fınalda «Sanremo Junior Kazakhstan» birinshi ulttyq baıqaýynyń Gran-Prı laýreaty jáne Italııadaǵy dúnıejúzilik «Sanremo Junior» baıqaýynyń ekinshi oryn ıegeri, qaraǵandylyq 12 jasar ánshi Maǵjan Myńbaev óner kórsetedi.

Baıqaýdyń kórkemdik jetekshisi - Batyrjan Smakov jobanyń Qazaqstan úshin ımıdjdik máni zor ekenin aıtady. Ulttyq irikteýge qatysý jáne Italııadaǵy baıqaýǵa joldama alý — Qazaqstannyń jas daryndaryna álemge áıgili ARISTON teatrynda óz ónerin pash etýge múmkindik beredi. Bul - jastardy jańa shyǵarmashylyq belesterge jeteleý úshin mańyzdy qadam.

Aıta keteıik, jobanyń aqparattyq seriktesteri — Jibek Joly jáne Aqtóbe telearnalary.