Sanofi tobynyń Ortalyq Azııadaǵy bas dırektory ózgerdi
ALMATY. 23 qyrkúıek. QazAqparat - Sanofi tobynyń Ortalyq Azııadaǵy bas dırektory bolyp Frank Hamalıan taǵaıyndaldy.
Kompanııanyń baspasóz qyzmetiniń habarlaýynsha, Sanofi toby qazirgi tańda Almatydaǵy shtab-páterimen Qazaqstan, Qyrǵyzstan, Ózbekstan, Tájikstan, Túrkimenstan, Grýzııa, Armenııa jáne Ázirbaıjannyń aýmaǵynda jumys isteıdi. Sanofi tobyna 2006 jyly qosylǵan F. Hamalıan myrzanyń farmatsevtıkalyq ındýstrııa salasynda jumys isteýde mol halyqaralyq tájirıbesi bar. Bastapqyda Sanofi-diń Parıjde ornalasqan shtab-páterinde Afrıka - Orta Shyǵys - Latyn Amerıkasy - Eýrazııa qurlyqaralyq aımaǵy boıynsha ákimshilik basshysy bolǵan ol, 2010 jyly Ortalyq Amerıkadaǵy jáne Karıb óńirindegi 20 eldiń aýmaǵynda kompanııanyń qyzmetine jetekshilik ete otyryp, Sanofi-di sol óńirdegi naryqtyń kóshbasshylyǵyna alyp keldi. Endi Marokkodaǵy Sanofi-diń bas dırektory laýazymyna taǵaıyndalǵan Haısam Shraıteniń ornyn basyp otyr. Parıj ýnıversıtetin farmatsııadaǵy doktor dıplomymen aıaqtap, Lıondaǵy EM bıznes-mektebiniń magıstr dárejesin alǵan F.Hamalıannyń farmatsevtıkalyq ındýstrııadaǵy mansaby 1997 jyly bastalǵan bolatyn. Sanofi tobyna aýysqanǵa deıin 6 jyl boıy strategııalyq menedjmentte mamandanǵan Arthur D.Little jahandyq konsaltıngtik kompanııasynda jumys istedi. Qazaqstanda 1997 jyldan beri jumys jasaıtyn bul kompanııanyń dúnıe júzi boıynsha 110 myńnan astam qyzmetkeri bar. Ol óz qyzmetinde - vaktsınalar, retsepsiz bosatylatyn preparattar, qant dıabetin emdeý, ınnovatsııalyq preparattar, mal dárigerligi jáne sırek kezdesetin tuqym qýalaıtyn aýrýlardy emdeý, damyp kele jatqan elderdiń naryǵyna belsendi qatysý sııaqty 7 negizgi baǵyt boıynsha aldyńǵy oryndarǵa ıe.
