Sankt-Peterbýrgtegi jarylys kezinde zardap shekkender arasynda qyzylordalyq stýdentter joq
QYZYLORDA. QazAqparat-Sankt-Peterbýrgtegi metro stansasynda bolǵan jarylystan zardap shekkender arasynda qyzylordalyq stýdentter joq, dep habarlady QazAqparat HAA tilshisi oblystyq jastar saıasaty máseleleri basqarmasyna silteme jasap.
Sankt-Peterbýrgtegi terrorızm aktisi 3 sáýir kúni "Tehnologıcheskıı ınstıtýt" jáne "Sennaıa ploşad" stansalary aralyǵynda oryn alǵan. Qoldan jasalǵan jarylǵysh zat 300 gramǵa jýyq trotıldik ekvıvalenttegi jaraqattaıtyn elementtermen toltyrylǵan. Sońǵy aqparattarǵa sáıkes jarylystan 11 adam qurban bolyp, 45 zardap shekken, onyń 39-y aýrýhanaǵa jatqyzylǵan, sonyń ishinde 15 jasar qyz bala bar.
Qyzylorda oblysynyń ákimdigi QR Sankt-Peterbýrg qalasyndaǵy Bas konsýly Ermek Pirimbetovpen jáne stýdentter ókilderimen tyǵyz baılanys ornatty.
Esterińizge sala keteıik, oblys ákimdiginiń bastamasymen 390 qyzylordalyq stýdent RF Úkimeti qarajaty esebinen Máskeý jáne Sankt-Peterbýrg qalalaryndaǵy ınjenerlik-tehnıkalyq joǵary oqý oryndarynda bilim alýda. Olardyń 88-i Sankt-Peterbýrg memlekettik ósimdik polımerleri tehnologııalyq ýnıversıtetinde oqıdy.
