Sankt-Peterbýrgtegi teraktige qoldaý jasaǵandardyń ishinde qazaqstandyqtar joq - SІM

ASTANA. QazAqparat - Sankt-Peterbýrgtegi teraktige qoldaý jasady degen kúdikpen ustalǵan Ortalyq Azııa elderiniń 6 azamaty qatarynda qazaqstandyqtar joq. Bul týraly «QazAqparat» tilshisine QR Syrtqy ister mınıstrliginiń baspasóz qyzmeti habarlady.

«Aqparat tekserildi. Ustalǵandardyń qatarynda qazaqstandyqtar joq», - dep atap ótti «QazAqparat» tilshisine QR SІM baspasóz qyzmetinde.

Bunyń aldynda habarlanǵanyndaı, 5 sáýirde Reseıdiń Federaldyq qaýipsizdik qyzmeti, Іshki ister mınıstrligi men Reseı gvardııasynyń arnaıy qyzmeti jedel-izdestirý sharasy kezinde Reseıge jumys isteýge kelgen Ortalyq Azııa memleketteriniń 6 azamatyn quryqtady.

Tergeý nusqasy boıynsha, olar 2015 jyldan beri terrorıstik baǵyttaǵy qylmystar jasaý maqsatynda «Djebhat an-Nýsra» men «Islam memleketi» lańkestik uıymdaryna Ortalyq Azııadan shyqqan azamattardy Reseıge tartýmen aınalysqan.

Sonymen qatar, kúdiktiler adamdardy ózge de memleketterge qarýly qaqtyǵystarǵa jiberý maqsatynda tartýy yqtımal. Kúdiktilerdiń turǵylyqty mekenjaılaryn tintý jumystary júrgizilýde. Onyń barysynda ekstremıstik sıpattaǵy ádebıetter tabyldy.

«Olardyń barlyq baılanystary men kontaktileri tekseriletin bolady. Qazirgi tańda ustalǵandardyń Sankt-Peterbýrgtegi teraktini jasaǵan azamatpen aradaǵy tanystyǵy bolǵany týraly derekter joq», - delingen RF-tiń Tergeý komıtetiniń habarlamasynda.