Sankt-Peterbýrgtegi III Qazaqstan-Reseı medıaforýmy: Aqıqat jalǵan aqparattan ozyq júrýi kerek
ASTANA. KAZINFORM — III Qazaqstan-Reseı medıaforýmy qazirgi aqparattyq keńistiktegi ózekti syn-qaterlerdi talqylaý jáne aldaǵy yntymaqtastyq baǵyttaryn aıqyndaý úshin medıa qaýymdastyq ókilderin, memlekettik organdar men sarapshylardy bir alańǵa jınady.
Forýmnyń negizgi taqyryptary qatarynda jasandy ıntellekt dáýirindegi jýrnalıstıkanyń keleshegi men oǵan tónetin syn-qater, tsıfrlyq tehnologııalardy qoldaný, artyq ári senimsiz aqparatpen kúres, medıa salasynyń kadrlyq áleýetin nyǵaıtý jáne dástúrli redaktsııalardyń transformatsııasy boldy.
QR Prezıdenti Teleradıokesheniniń dırektory Raýshan Qajybaeva Qasym-Jomart Toqaev pen Vladımır Pýtınniń basshylyǵymen jan-jaqty strategııalyq yntymaqtastyq deńgeıine kóterilgen Qazaqstan men Reseı arasyndaǵy kópjyldyq áriptestik jáne odaqtastyq qatynastardy aqparattyq turǵydan súıemeldeýde BAQ róli mańyzdy ekenin basa aıtty.
— Bul bıylǵy mamyr aıynda Reseı Prezıdentiniń Qazaqstanǵa memlekettik sapary kezinde qol qoıylǵan Dostyq pen tatý kórshiliktiń jeti qaǵıdaty týraly birlesken málimdemede naqty kórinis tapty. Mańyzy zor bul qujat eki el qarym-qatynasynyń uzaqmerzimdi baǵyt-baǵdaryn aıqyndap, ekonomıkadan mádenıet pen bilim salasyna deıingi keń aýqymdy máselelerdi qamtıdy, — dedi R. Qajybaeva.
Prezıdent Teleradıokesheni dırektorynyń aıtýynsha, búginde Qazaqstan men Reseıdiń buqaralyq aqparat quraldary mańyzdy mıssııa atqaryp otyr — olar eki el men halyq arasyndaǵy ózara túsinistik, senim jáne tatý kórshilik qatynastardy nyǵaıtý jolynda kásibı, baıypty ári jaýapty jumys istep keledi. Óıtkeni aqıqat árdaıym jalǵan aqparattan ozyq júrýi kerek.
— Zııatkerlik menshikti qorǵaý negizderi, azamattardyń tsıfrlyq quqyqtaryna kepildik berý, onyń ishinde derbes derekterdi qorǵaý jáne tsıfrlyq qaýipsizdikti qamtamasyz etý máseleleri Qazaqstandy jańǵyrtýdyń jańa kezeńinde kúshine engen jańa Konstıtýtsııada bekitilgen. Bul normalar medıa salasyn, tsıfrlyq jýrnalıstıkany jáne aqparattyq yntymaqtastyqty damytýdyń zamanaýı quqyqtyq negizin qalyptastyrady, — dep atap ótti R. Qajybaeva.
QR Mádenıet jáne aqparat mınıstriniń birinshi orynbasary Qanat Ysqaqov Qazaqstan men Reseıdiń medıa salasyndaǵy yntymaqtastyǵyn damytýdyń mańyzdy baǵyttarynyń biri — birlesip kontent óndirý bolýy qajettigin aıtty.
— Bizdiń búkil jumysymyzdyń basty maqsaty — tarıhı, mádenı jáne ekonomıkalyq baılanystardy odan ári nyǵaıtýǵa, sondaı-aq ózara yqpaldastyǵymyzdyń tikeleı arnasyn saqtaýǵa baǵyttalýy tıis. Sol arqyly biz bir-birimizben tikeleı baılanysyp, barlyq máseleni birge talqylap, sheshe alamyz. Bul anaǵurlym tıimdi ári nátıjeli, — dedi Qanat Ysqaqov.
Al QR Prezıdenti Ákimshiliginiń kommýnıkatsııalar bóliminiń meńgerýshisi Qanat Qulshymanov Qazaqstan men Reseıdiń medıa salasyndaǵy yntymaqtastyǵyn odan ári damytýdyń bes negizgi baǵyty týraly aıtty.
TASS agenttiginiń bas dırektory Andreı Kondrashov Qazaqstan men Reseıdiń kásibı jýrnalıster qaýymy eki el halyqtary arasyndaǵy senimdi nyǵaıtýda jáne obektıvti aqparattyq kún tártibin qalyptastyrýda mańyzdy ról atqaratynyn atap ótti.
— Qazirgi halyqaralyq ahýaldyń kúrdeli ári qaýip-qaterge toly ekenin eskersek, kásibı jýrnalıster qaýymynyń qos memleket pen halyqtar arasyndaǵy senimdi nyǵaıtýdaǵy, bolyp jatqan oqıǵalardyń shynaıy kórinisin qalyptastyryp, olarǵa ádil baǵa berýdegi róli erekshe. Al bizdiń jaǵdaıda jýrnalıster Qazaqstan men Reseı arasyndaǵy yntymaqtastyqtyń nyǵaıýyna, ortaq gýmanıtarlyq jáne rýhanı keńistiktiń, qaýipsiz ári shynaıy aqparattyq ortanyń qalyptasýyna, túptep kelgende, baýyrlas eki halyqtyń ortaq bolashaǵyn qurýǵa naqty úles qosyp otyr, — dedi Andreı Kondrashov.
Ol Qazaqstannyń tsıfrlandyrý jáne jasandy ıntellektini damytý salasyndaǵy jetistikterine toqtalyp, JI týraly zańnyń qabyldanýyn, Tsıfrlyq kodeks ázirleý jumysyn jáne osy baǵyttaǵy bilim berý júıesiniń damýyn atap ótti. Onyń aıtýynsha, bul tájirıbe reseılik áriptesterdiń de qyzyǵýshylyǵyn týdyrady.
III Qazaqstan-Reseı medıaforýmynyń mańyzy tek medıa salasymen shektelmeıdi, onyń qoǵamdyq-saıası máni de zor. Forým qorytyndylary Qazaqstan men Reseı arasyndaǵy yntymaqtastyqty ári qaraı nyǵaıtýǵa, gýmanıtarlyq baılanystardy keńeıtýge, sondaı-aq eki eldiń ortaq aqparattyq keńistiginde senim men ózara túsinistik ahýalyn qalyptastyrýǵa yqpal etedi.
Eske salaıyq, osy alańdaǵy alǵashqy kezdesý 2024 jylǵy qarashada Máskeýde ótken bolatyn. Bastapqyda qazaqstandyq jáne reseılik jýrnalısterdiń basqosýy dóńgelek ústel formatynda uıymdastyrylmaq bolǵan. Alaıda talqylaý barysynda qatysýshylar onyń aýqymyn keńeıtip, medıaforým deńgeıinde ótkizýdi uıǵardy. Sondaı-aq bul is-sharany turaqty túrde uıymdastyrý jóninde kelisimge kelgen edi.
