Sankt-Peterbýrgte Tramptyń arnaıy ókili Pýtınmen kezdesti

ASTANA. KAZINFORM — Sankt-Peterbýrgte AQSh prezıdentiniń arnaıy ókili Stıv Ýıtkoff Reseı prezıdenti Vladımır Pýtınmen kezdesti, onda olar Ýkraınaǵa qatysty máseleni talqylady.

Reseı basshysymen kezdesýden buryn AQSh ákimshiliginiń ókili Reseıdiń sheteldermen ınvestıtsııalyq-ekonomıkalyq yntymaqtastyq jónindegi prezıdenttiń arnaıy ókili jáne Reseı tikeleı ınvestıtsııalar qorynyń basshysy Kırıll Dmıtrıevpen kelissózder júrgizdi.

Aq úıdiń baspasóz hatshysy Karolın Levıtt bul kezdesýge túsinikteme bere otyryp, Ýıtkofftyń Reseıge sapary Ýkraınadaǵy atysty toqtatýǵa jáne aqyrynda beıbit kelisimge jetýge baǵyttalǵan taǵy bir qadam ekenin atap ótti. Ol Ýıtkofftyń Kremlmen jáne Vladımır Pýtınmen tikeleı baılanys ornatý úshin Reseıde bolǵanyn rastady.

Reseı prezıdentiniń baspasóz hatshysy Dmıtrıı Peskov Pýtın men Ýıtkofftyń kezdesý qorytyndysy boıynsha AQSh jáne Reseı basshylarynyń telefon arqyly sóılesýi teorııalyq turǵydan múmkin ekenin aıtty.

Eske salsaq, Stıv Ýıtkoff Sankt-Peterbýrgke bardy.

Buǵan deıin ol 13 naýryzda Máskeýde bolǵan, sol kezde Ýıtkoff Reseıdiń joǵary laýazymdy sheneýnikterimen, sondaı-aq prezıdentpen kezdesti. Reseı prezıdentiniń baspasóz hatshysy Dmıtrıı Peskov Stıv Ýıtkofftyń Reseı tarapyna Ýkraına boıynsha qosymsha aqparat bergenin, al Reseı prezıdenti Ýıtkoff arqyly AQSh-taǵy áriptesine aqparat pen qosymsha sıgnaldar joldaǵanyn habarlaǵan edi.

Aqpan aıynda Ýıtkoff Reseıde esirtki kontrabandasy úshin sottalǵan amerıkalyq Mark Fogeldi aıyrbastaý týraly kelissózder júrgizý úshin bardy, sodan keıin Er-Rııadtaǵy Reseı-AQSh joǵary deńgeıdegi kelissózderge qatysty.