Sankt-Peterbýrgte ózenge qulaǵan avtobýs júrgizýshisi qamaýǵa alyndy

MÁSKEÝ. KAZINFORM – Sankt-Peterbýrgtiń Oktıabr aýdandyq soty 10 mamyrda Moıka ózenine qulaǵan avtobýs júrgizýshisi Rahmatshoh Kýrbonovty 9 shildege deıin qamaýǵa aldy, dep habarlaıdy DW.  

Er adam eki nemese odan da kóp adamnyń ólimine ákep soqtyrǵan jol qozǵalysy erejesin buzdy dep aıyptalýda. Júrgizýshi jeti jylǵa bas bostandyǵynan aıyrylýy múmkin.

Sot otyrysynda Kýrbonov óz kinásin moıyndap, ózi basqarǵan avtobýstyń tejegishinde aqaý bolǵanyn málimdedi. Ol jasaǵan áreketine ókinetinin jetkizip, marqumdardyń týystaryna kóńil aıtty.

Sol kúni Reseı Federatsııasynyń Tergeý komıteti Rahmatshoh Kýrbonovqa qarsy ekinshi qylmystyq is – sheteldik azamattardy jalǵan tirkeýge alý boıynsha qozǵalǵanyn habarlady. Tergeýshilerdiń málimetinshe, ol 2024 jyldyń aqpany men naýryz aılarynda aqshalaı syıaqy alyp, óz páterine kem degende 10 sheteldik azamatty jalǵan tirkegen.

Sankt-Peterbýrg ortalyǵynda kezekti avtobýs apaty saldarynan jeti jolaýshy qaza tapty, ekeýi aýyr halde aýrýhanada jatyr. Oqıǵa ornynan túsirilgen beınematerıalda avtobýstyń Úlken Morskaıa kóshesinen Moıka arqyly Potselýev kópirine ońǵa burylyp, qarsy jolaqqa shyǵyp, jolaýshylar kóligin soǵyp, sosyn qorshaýdy buzyp ótip, ózenge qulaǵany jáne batyp ketkeni baıqalady.

Buǵan deıin habarlaǵanymyzdaı, «Taksı» jaýapkershiligi shekteýli seriktestigi avtokolonnasynyń basshysy avtobýstyń qulaýy saldarynan adam ólimine qatysy bar degen kúdikpen ustaldy.