Sankt-Peterbýrgte qazaqstandyq avangard negizin salýshynyń kórmesi ashyldy
ASTANA. QazAqparat - Sankt-Peterbýrgte Qazaqstan Respýblıkasy Ulttyq mýzeıi zamanaýı ónerdiń «Erarta» mýzeıinde Moldaqul Narymbetovtiń «Kók nemese jasyl-kógildir fondaǵy qara quıyndar» kórmesin ashty, dep habarlaıdy QazAqparat QR SІM baspasóz qyzmetine silteme jasap.
Kórme sýretshiniń 70-jyldyǵyna arnalady jáne «Jahandanǵan álemdegi Qazaqstannyń zamanaýı mádenıeti» jobasyn júzege asyrý aıasynda uıymdastyrylady. Kórmede sheberdiń 1989-2009 jyldar arasynda jasaǵan týyndylary ekspozıtsııalanady. Olardyń arasynda kórkem sýret, ınstallıatsııa, músin, sol sııaqty sýretshi ótkizgen perfomanstar men aktsııalardyń muraǵattyq vıdeolary bar.
Kórmeni ashqan Bas konsýl Bolat Imanbaev «qoǵam damýynyń basty kórsetkishi - onyń mádenı jetistigi. Biz úshin Qazaqstannyń jetistikterin álemdik deńgeıde, aıtalyq Reseıdiń mádenı astanasy - Sankt-Peterbýrg sekildi qalada jarııalaý asa mańyzdy» dedi.
Aıta keterligi, 90 jáne 2000-jyldardyń basynda Qazaqstannyń zamanaýı ónerin esimderi keıinnen Ortalyq Azııa úshin belgili bolǵan sýretshiler jasady. Olardyń arasynda Moldaqul Narymbetov te (1948-2012) bar. Ol qalyptasyp úlgergen sýretshi úshin postkeńestik keńistik úshin jańalyq bolǵan perfomans, ınstallıatsııa, aktsııa syndy kórkemóner úlgilerin meńgerýge múmkindik bergen óziniń jarqyn daralyǵymen, erekshe daryndylyǵymen erekshelendi.
Moldaqul Narymbetov keıinnen ataýy «Qyzyl traktor» dep ózgertilgen 1990 jyly Shymkent qalasynda qurylǵan sýretshilerdiń «Transavangard» birlestiginiń jetekshisi boldy. Qyzyl traktorshylar batys óneriniń avangardtyq ádisterin shyǵys mádenıetiniń dástúrli ónegelerimen assımılıatsııalaý múmkindikterin tabýǵa umtyldy. Olardyń kórkemdik tujyrymdamalarynyń negizi úshin Qazaqstannyń ıslamǵa deıingi ejelgi salttary, shamandyq salt-joralary, sopylyq rásimderi alyndy. Shyndyq pen úılesimdiliktikti izdegen nemese baqsylyq áreketterimen emdeýge nemese shyndyq pen oıdan shyǵarylǵandy, ótkendi, qazirgini jáne keleshekti biriktirýge tyrysyp salt-joralaryn jasap, dúnıeni aralap kezip júrgen dárýish sheshýshi beınege aınaldy.
QR Ulttyq mýzeıi dırektorynyń mindetin ýaqytsha atqarýshy L.Kochetov, Moldaqul Narymbetov máni tereń, ótkir jáne kontseptýaldy jumystar jasaǵanyn atap ótti. Onyń eńbekteri ýaqytpen úılese otyryp, sol dáýirdiń qaıshylyqtaryn boıyna sińire bilgen.
Kórmede sýretshiniń basqa da kórkem formatsııalarmen qatar batystyq postavangardtyń aımaqtyq kórinisine aınalǵan «transavangardtyq baqsylyq» degen ataý alǵan «Qyzyl traktordyń» mıftik shyǵarmashylyq kezeńin kórsetetin belgili týyndylary ekspozıtsııalandy.
