Sankt-Peterbýrgte qazaqstandyq bes kýrsantqa dıplom tabystaldy
ASTANA. KAZINFORM — Qazaqstan Respýblıkasy Tótenshe jaǵdaılar mınıstri general-leıtenant Shyńǵys Árinov Reseı TJM Memlekettik órtke qarsy qyzmetiniń Sankt-Peterbýrg ýnıversıtetinde ótken túlekterdiń oqý bitirý rásimine qatysty. Bul týraly TJM baspasóz qyzmeti málim etti.
Mınıstr ýnıversıtet basshylyǵymen birge Sobor alańynda túlekterge dıplom tabystady. Olardyń qatarynda Qazaqstannyń bes azamaty bar. Bıyl oqý ornynyń qurylǵanyna 120 jyl tolyp otyr.
Shyńǵys Árinov ýnıversıtettiń professorlyq-oqytýshylyq quramyna jáne basshylyǵyna bilikti mamandar daıarlaǵany úshin alǵys bildirip, jas ofıtserlerdi oqýyn sátti aıaqtaýlarymen quttyqtady.
Mınıstrdiń aıtýynsha, oqýyn aıaqtaǵan túlekter Qazaqstanǵa oralǵannan keıin TJM-niń aýmaqtyq bólimshelerine bólinip, qyzmetke kirisedi.
Búginde atalǵan ýnıversıtette Qazaqstannan kelgen taǵy 20 kýrsant beıindi mamandyqtar boıynsha bilim alyp jatyr.
Eske sala keteıik, buǵan deıin Túrkııa prezıdenti qazaq ofıtserine dıplom tabystaǵan bolatyn. Ol Ankarada Jandarmerııa jáne jaǵalaý kúzeti Akademııasyn támamdady.
