Sankt-Peterbýrgte Álııa Moldaǵulovaǵa eskertkish qoıylady
Aqtóbege Elbasy Nursultan Nazarbaevtyń maqalasyn túsindirý toby keldi. Olardyń arasynda «Egemen Qazaqstan» respýblıkalyq gazeti» AQ basqarma tóraǵasy Darhan Qydyráli, «QazAqparat» halyqaralyq aqparat agenttiginiń bas dırektory Asqar Ýmarov, «Qasıetti Qazaqstan» ǵylymı-zertteý ortalyǵynyń dırektory Berik Ábdiǵalı, qoǵam qaıratkeri, saıasattanýshy Aıdos Sarym, «Qazaqstan blogerleri Alıansy» QB tóraǵasy Ǵalym Baıtýk bar.
«Ótken jyly Reseıdegi Qazaqstan elshiligimen birlesip, Rjev qalasyndaǵy memorıaldyq keshen jańǵyrtyldy. Elshilik pen mınıstrlik arasyndaǵy kelisimge sáıkes jumys keler jyly jalǵasady. Endi Tver oblysyndaǵy qazaqstandyqtar jerlengen jerge de arnaıy belgi qoıylady. Reseıdegi Qazaqstan elshisi Imanǵalı Tasmaǵambetov Sank-Peterbýrgte Álııa Moldaǵulovanyń eskertkishin ornatý ıdeıasyn aıtty. Biz qoldap, keler jyly isti bastaımyz», - dedi oblys ákimi Berdibek Saparbaev.
Buǵan deıin «Rýhanı jańǵyrý» baǵdarlamasy aıasynda «Kıeli jerler geografııasy» jasalyp, óńirlerde tizim jasaldy. Aqtóbe oblysy boıynsha 10 jer tizimge endi.
««Kıeli jerler geografııasy» - tarıhı sana-sezimimizdi qalyptastyrýǵa, jańǵyrtýǵa baǵyttalǵan jumys. Ata-babamyz baryp, zııarat jasap júrgen, saıası mańyzy bar oryndar qosyldy. Ótken jyly «Qasıetti Qazaqstannyń» 1-tomy shyqty. Bıyl Aqtóbe, Atyraý, Mańǵystaý, Batys Qazaqstan oblystary boıynsha kitap shyǵady. Endi shekaranyń ar jaǵynda, boıynda jatqan kıeli jerler tizimi jasalady. Máskeý tóńiregindegi tarıhı jerlerdi alsaq, Arynǵazy han Kalýgada jerlengen. Naqty orny belgisiz bolsa da, aýmaǵy bar. Sol jerge belgi, eskertkish qoıýǵa usynys jasaımyz. Sonymen qatar, Tver oblysynyń Olenınskıı aýdanynda 1 myńnan astam qazaq jerlengen jer bar. Arnaıy belgi qoıý qajet dep oılaımyz. Mektep janynda 100, 101-atqyshtar brıgadasyna mýzeı ashylǵan. Biraq jaǵdaıy máz emes. Kómektesip, qoldaý kórsetýdi qajet etip tur», - dedi «Qasıetti Qazaqstan» ǵylymı-zertteý ortalyǵynyń dırektory Berik Ábdiǵalı.
