Sankt-Peterbýrgte «Abaı» aqparattyq-mádenı ortalyǵy ashyldy

NUR-SULTAN. QazAqparat – Reseıdiń Ulttyq kitaphanasynda «Abaı» aqparattyq-mádenı ortalyǵynyń ashylýy ótti, dep habarlaıdy QR SІM baspasóz qyzmeti.

Іs-shara qazaqtyń Uly aqyny Abaı Qunanbaıulynyń 175 jyldyǵyn merekeleý aıasynda QR Mádenıet jáne sport mınıstrligi jáne QR Ulttyq akademııalyq kitaphanasy (UAQ) qoldaýymen uıymdastyryldy.

Ortalyqta Abaı shyǵarmalarynyń jáne ol týraly basylymdardyń kórmesi bolady. Munda ár kelýshi aqynnyń ómiri men shyǵarmashylyǵy týraly materıaldardy, onyń shyǵarmalarynyń álemniń túrli tilderindegi eńbekteri men aýdarmalaryn, belgili abaıtanýshylar, fılologtar men jazýshylardyń zertteýlerin, elektrondy jáne notalyq basylymdardy, Abaı shyǵarmalarynyń jınaqtaryn taba alady.

Ashylý saltanatyna QR Sankt-Peterbýrgtegi Bas konsýly Baýyrjan Dosmanbetov, UAQ jetekshisi Úmithan Muńalbaeva, «Ata-Meken» úkimettik emes uıymynyń basshysy Sársenǵalı Quspanov, sondaı-aq Sankt-Peterbýrgtiń ǵylymı jáne shyǵarmashylyq ıntellıgentsııasy qatysty.

Іs-shara aıasynda qazaq dıasporasynyń ókilderi men jas aqyn, «Daryn» Memlekettik jastar syılyǵynyń laýreaty Bekzat Smaǵulovtyń oryndaýynda Abaı Qunanbaıulynyń shyǵarmalary qazaq jáne orys tilderinde shyrqaldy.