Sankt-Peterbýrg metrosynda teraktini uıymdastyrǵandardyń biri ustaldy
ASTANA. QazAqparat - Reseı Federaldy qaýipsizdik qyzmeti (FQQ) 3 sáýir kúni Sankt-Peterbýrg metrosynda lańkestik aktisin uıymdastyrdy degen kúdikpen 27 jastaǵy Ortalyq Azııanyń týmasy Abror Azımovty ustady.
Reseı FQQ Qoǵammen baılanys ortalyǵynan TASS agenttigine habarlaǵandaı, RF Federaldy qaýipsizdik qyzmeti Sankt-Peterbýrg metropolıteninde bolǵan terrorıstik aktisi boıynsha Reseı Tergeý komıteti (TK) qozǵaǵan qylmystyq is aıasynda dúısenbi kúni Máskeý oblysy Odıtsovsk aýdanynda qylmysty uıymdastyrýshylardyń biri, 1990 jyly týǵan Ortalyq Azııa týmasy Azımov Abror Ahralulyn ustady. Ol jankeshti-terrorıst (metroda jarylys jasaǵan) Akbarjon Alımovty daıyndaǵan.
Jedel qyzmetkerlerdiń biri kúdiktiden: «Sizdi ne úshin ustaǵanyn bilesiz be?», - dep surady. «Iá», - dedi Azımov. Keıin odan tapansha men eki smartfon tárkilendi.
Tergeý komıtetiniń resmı ókili Svetlana Petrenko TK teraktini uıymdastyrýshylardy anyqtaýdy jalǵastyryp jatqanyn málimdedi.
Eske sala keteıik, 3 sáýir kúni Sankt-Peterbýrg metrosynyń «Sennaıa ploşad» beketinde jarylys boldy. Saldarynan 14 adam qaza taýyp, 50 adam jaraqattandy. Ajal qushqandar arasynda Qazaqstan azamaty, Sankt-Peterbýrg memlekettik ekonomıkalyq ýnıversıtetiniń stýdenti Maksım Aryshev boldy.
