Sankt-Peterborda qorshaý balalaryna arnalǵan eskertkish ashyldy

QazAqparat tilshisi habarlap otyrǵandaı, jańa eskertkish 1953 jyly qaladaǵy bir mektep oqýshylarynyń blokadalyq qala balalaryn eske alyp ekken Vasılev aralyndaǵy Almaly baqshasynda ashyldy.

«Bul jas lenıngradshylardyń batyrlyǵy men erjúrektiligine arnalǵan eskertkish. «Bala» men «qamal, qorshaý» sózderin birge qoldaný aýyr, alaıda surapyl soǵys olardy biriktirdi. Tórt júz myńnan astam bala Lenıngrad qamalynda qalǵan bolatyn. Olardyń barlyǵy ómir joldaryn jalǵastyra almady. Lenıngrad qorshaýynyń búldirshinderin qamalǵan qala perishteleri desek bolady», - deıdi qala gýbernatory Valentına Matvıenko.

V.Matvıenko byltyrǵy jyly qalanyń Vasılev araly turǵyndarynyń ótinishine qulaq asyp, baqshany qaıta qurastyrý úshin qarjy bólgenin habarlady. Kúrdeli jóndeý jumystary júrgizilgen, joldar durystalyp, gúlder otyrǵyzylǵan. Sondaı-aq qamaýda qalǵan balalarǵa arnap eskertkish ornatý sheshimi de qabyldanǵan bolatyn.

Eskertkishtiń ashylý saltanatyna jaqyn jerdegi mektep oqýshylary, Uly Otan soǵysynyń ardagerleri, qorshaýda bolǵandar jınaldy. Sharaǵa qatysýshylar qorshaýda qaza tapqan balalardy bir mınót únsizdikpen eske aldy. Eskertkishke gúlder men oıynshyqtar qoıyldy. Kishkentaı lenıngraddyqtardy eske alýǵa kelgen árbir adam osy baqtyń almasynan dám tatty.