Sankt-Peterborda Qazaqstannyń ІІM zeınetkeri oqys jaǵdaıda qaıtys bolǵan
MÁSKEÝ. QazAqparat – Sankt-Peterborda mert bolǵan 62 jastaǵy qazaqstandyq ІІM zeınetkeri Vıacheslav Jeksenov ıshemııalyq aýrýmen aýyrǵan , dep habarlaıdy QazAqparattyń Máskeýdegi menshikti tilshisi.
RF Tergeý komıteti qalalyq Bas tergeý basqarmasynyń BAQ-pen baılanys basshysynyń aǵa kómekshisi Sergeı Kapıtonovtyń aıtýynsha, 2020 jyldyń 21 qańtarynda qaza tapqan 1957 jyly týǵan zeınetkerdiń ólimine qatysty tergeýge deıingi tekserý jumystary júrip jatyr.
«Jazataıym jaǵdaı bolǵan degen nusqa bar. Ol ıshemııalyq aýrýmen aýyrǵan. Esinen tanyp qaldy degen boljam bar. Ol óz denesimen birdeı bıiktikten qulap, jabyq bas súıek-mı zaqymyn alǵan», -dedi S.Kapıtonov.
Oqıǵa túski ýaqytta bolǵan. Mert bolǵan adam aýrýhanaǵa 15:37-de jetkizilip, 16:41-de ómirden ozdy. Zeınetker birinshi qabatta páterine kire beriste ornalasqan arkada jatqan kúıi tabylǵan.
«Osy ýaqytta arkada jasóspirim jigitter bolǵan. Olar únemi sol aýmaqta jınalyp temeki shegedi eken. Ol bozbalalarǵa eskertý jasap, jigitter qaıtpaq bolǵan. Sol sátte zeınetker esikti ashaıyn dep jatyp qulaǵan. Oqýshylar oǵan alǵashqy medıtsınalyq kómek kórsetýge tyrysyp, jedel járdem shaqyrdy. Sonymen qatar, dál sol ýaqytta páterde onyń áıeli men qyzy bolǵan», - dedi baspasóz qyzmeti ókili.
Qazirgi ýaqytta tergeýge deıingi tekserý jumystary júrgizilip jatyr, barlyq nusqalar qarastyrylýda. Oqıǵa orny tekserildi, kýágerlerden jaýap alynyp jatyr. Sot-medıtsınalyq saraptama taǵaıyndaldy, sonymen qatar V.Jeksenovtiń týystarynan jaýap alyndy.
«Negizgi nusqa – jazataıym oqıǵa. Ony uryp-soqty nemese oǵan qastandyq jasaldy dep aıtýǵa negiz joq. Basyna zaqym kelgeninen basqa dene jaraqatyn almaǵan», - dedi S.Kapıtonov.
Tergeýge deıingi tekseris nátıjesi boıynsha protsessýaldyq sheshim shyǵarylady.
Avtory: Narymbek Ysmaǵulov
