Sankt-Peterbor qalasyndaǵy keleli basqosý
ASTANA. QazAqparat - Sankt-Peterbor qalasynda HH Peterbor Halyqaralyq ekonomıkalyq forýmy ótti. Alqaly jıynda álemdik deńgeıdegi kókeıkesti máseleler talqyǵa salyndy. Memleketter kóshbasshylary álemdik daǵdarystyń ekonomıkalyq jáne áleýmettik saldarlaryn, jahandyq ekonomıkany qalpyna keltirý máselesine nazar aýdardy. Atalmysh forýmǵa Qazaqstan Respýblıkasynyń Prezıdenti Nursultan Nazarbaev qatysty. Forým aıasynda Prezıdent ekijaqty kezdesýler ótkizip, Reseıdiń bıznes ókilderimen suhbat qurdy. Basqosýǵa «Eýrohım», «Efko», «Lýkoıl», «Polımetall», «Eýropa podshıpnık korporatsııasy», «Skolkovo», «Reseı temir joldary» jáne «AvtoVaz» sııaqty reseılik iri kompanııalardyń jetekshileri qatysty.
Elbasy óz sózinde qazan aıynda Astanada óńirlik forým ótetinin eske sala otyryp, Eýrazııalyq ekonomıkalyq odaq qurylǵannan bergi jetistikterimizdi saralap, kún tártibindegi máselelerdi sóz etti jáne aldaǵy birlesip atqarylatyn sharýalardy aqyldasý kerektigine toqtaldy. Nursultan Ábishuly eki eldiń arasyndaǵy saýda aınalymynyń tómendeýine syrtqy faktorlardyń da óz áserin tıgizgendigin, áıtse de ony eńserýge bolatyndyǵyn atap kórsetti. «Ol - bizdiń yntymaqtastyǵymyzdy odan ári keńeıte túsý. Eki el arasyndaǵy taýar aınalymy ótken jyly 15 mıllıard AQSh dollaryn qurady. Bul kórsetkish kezinde 30 mıllıard AQSh dollaryna jetken bolatyn. Yntymaqtastyǵymyzdy bekemdesek, birtindep ony da qalpyna keltiremiz» dedi N.Nazarbaev.
Forým aıasynda Elbasy Gvıneıa Respýblıkasynyń Prezıdenti Alfa Kondemen kezdesti. Memleketter basshylary saıası, saýda-ekonomıkalyq jáne mádenı-gýmanıtarlyq salalardaǵy ekijaqty baılanystardy jolǵa qoıý perspektıvalaryn qarastyrdy. Budan bólek, Islam Yntymaqtastyǵy Uıymy sheńberindegi birlesken jumystardy qosa alǵanda, halyqaralyq kún tártibindegi birqatar máseleler sóz boldy. Prezıdent musylmandar úshin qasıetti Ramazan aıynda ótip jatqan Gvıneıa Prezıdentimen alǵashqy kezdesýiniń sımvoldyq máni bar ekenin atap ótti. A.Konde Qazaqstan Prezıdentine kezdesý úshin alǵys aıtyp, ekijaqty seriktestiktiń túrli salalaryndaǵy qarym-qatynastardyń odan ári damı beretinine senim bildirdi.
Sonymen qatar halyqaralyq shara sheńberinde Qazaqstan Prezıdenti Nursultan Nazarbaev «Reseı temir joldary» AAQ prezıdenti Oleg Belozerovpen de kezdesti. Ekeýara áńgimede kólik-logıstıka salasyndaǵy yntymaqtastyqty damytý máseleleri, sondaı-aq eki eldiń kólik áleýetin iske asyrýdyń perspektıvaly baǵyttary talqylandy. O.Belozerov Qazaqstan tarapymen ózara is-qımyl deńgeıiniń joǵary ekenin atap ótip, taıaý kezeńge arnalǵan jumys josparlary jóninde áńgimeledi.
Al Prezıdent Nursultan Nazarbaevtyń Birikken Ulttar Uıymynyń Bas hatshysy Pan Gı Mýnmen kezdesýi barysynda Qazaqstan men BUU arasyndaǵy ekijaqty yntymaqtastyq máselelerine kóńil bólindi. Ekijaqty baılanysty odan ári damytý perspektıvalaryna mán berildi.
Elbasy BUU-men qarym-qatynasta Pan Gı Mýnnyń Bas hatshy qyzmetinde qol jetkizilgen ózara túsinistiktiń deńgeıi joǵary ekenin aıtty. Pan Gı Mýn Qazaqstan Prezıdentiniń Uıymmen seriktestik qarym-qatynastarynyń damýyna qosqan jeke úlesin atap ótip, qyzmettiń barlyq baǵyty boıynsha BUU-ǵa jan-jaqty qoldaý kórsetip kele jatqany úshin Nursultan Nazarbaevqa alǵys aıtty.
Al Qazaqstan Prezıdenti Nursultan Nazarbaev Reseı Federatsııasynyń Prezıdenti Vladımır Pýtınmen kezdesýi barysynda ekijaqty yntymaqtastyqtyń negizgi salalary men baǵyttaryn qamtıtyn, sondaı-aq Eýrazııalyq ekonomıkalyq odaq aıasyndaǵy ıntegratsııalyq úderisterdiń damýyna qatysty keń aýqymdy máselelerdi talqylady. Budan bólek, álemdik jáne óńirlik kún tártibindegi máseleler men ózara yntymaqtastyqty odan ári tereńdete túsý perspektıvalary da qarastyryldy.
