«Sankt-Peterbor-Almaty» reısi Reseıde bir táýlikten astam ýaqytqa keshikti
ASTANA. QazAqparat - Reseıdiń «soltústik astanasyndaǵy» áýejaıda qalǵan «Eır Astana» áýe kompanııasynyń jolaýshylary búgin Astana ýaqytymen túngi 03:00-de ushady.
Naqtyraq aıtqanda, «Sankt-Peterbor-Almaty» KS 136 reısiniń jolaýshylary keshe saǵat 15:40-ta (Astana ýaqytymen) ushýy tıis bolǵan. Alaıda, tehnıkalyq sebepterge baılanysty keshigip jatyr. Bul týraly QazAqparat tilshisine bergen suhbatynda «Eır Astana» áýe kompanııasynyń korporatıvti kommýnıkatsııalar boıynsha úılestirýshisi Dına Qasymova málim etti.
«Áýe kompanııasynyń kómegine júgingen jolaýshylar qonaq úılerge ornalastyryldy. Olardy tamaqtandyrý sharalary túgeldeı qamtyldy. Búgin de jolaýshylardyń qonaqúılerdegi merzimi uzartyldy. Máskeý ýaqyty boıynsha túngi saǵat 12-de Almatyǵa ushý josparlanǵan»,-dedi ol.
Onyń sózine qaraǵanda, keshigip jatqan reıste 140 jolaýshy tirkelgen, olardyń bir bóligi keshe Almatyǵa Máskeý arqyly attandy. Atap aıtqanda, Máskeýge deıin «Aeroflot» reısimen, al ary qaraı Almatyǵa «Eır Astana» reısimen jetkizildi.
«Jolaýshylardyń qalǵan bóligi qonaq úılerde jáne olar búgin ushady»,-dedi Dına Qasymova.
