Sanktsııalyq soǵystar barlyq tarapqa da shyǵyn ákeledi
ASTANA. QazAqparat - Búgin Úkimet úıinde ótken baspasóz máslıhatynda QR Investıtsııalar jáne damý vıtse-mınıstri Rýslan Dálenov AQSh-tyń Reseıge qatysty sanktsııasyna oraı pikir bildirdi, dep habarlaıdy QazAqparat.
«Sanktsııalyq soǵystar barlyq tarapqa da shyǵyn ákeledi dep sanaımyn. Onyń ishinde álemdik ekonomıkaǵa da janama áseri bolady. Sondyqtan bul jaıttyń odan ary damýyn qadaǵalap otyratyndyǵymyz sózsiz», - dedi ol BAQ ókilderiniń saýalyna oraı.
Aıta keteıik, keshe Tbılısıde júrgen AQSh-tyń vıtse-prezıdenti Maık Pens AQSh Prezıdenti Donald Tramptyń Reseıge qarsy sanktsııa engizý týraly zańǵa qol qoıatyndyǵyn málim etken bolatyn. AQSh kongresiniń ókilder palatasy ótken aptada qabyldaǵan zań jobasynda amerıkalyq kompanııalar men jeke tulǵalarǵa sanktsııaǵa ilikken reseılik banktermen mámile jasaýǵa tyıym salynady. Sonymen qatar reseılik energetıkalyq sektorǵa da jańa shekteýler engiziledi.
