Sanktsııalar Irannyń beıbit maqsattaǵy ıadrolyq baǵdarlamalaryn toqtata almaıdy
ASTANA. Sáýirdiń 9-y. QazAqparat - Salynǵaly otyrǵan sanktsııalar Irannyń ustanymyn ózgerte de, onyń beıbit maqsattaǵy ıadrolyq baǵdarlamasyn toqtata da almaıdy. Bul týraly beısenbi kúni el Prezıdenti Mahmud Ahmadınejad málim etti, dep habarlaıdy IRNA agenttigi.
«Biz kez-kelgen yǵyttar men sanktsııalarǵa teris qaraımyz. Jáne qoqan-loqy aıtylyp, sanktsııalar engizilgenniń ózinde qarsylastarymyzdan «olardy toqtatyńdar» dep jalynyp suramaımyz, kerisinshe, qalyptasqan ahýaldy óz ıgiligimizge paıdalanýǵa talpynamyz», - dep atap kórsetti Iran Prezıdenti óz sózinde.
Onyń aıtýynsha, santsııalyq rejım, álemdik ekonomıkalyq daǵdarystyń saldaryna asa boı bere qoımaǵan Irandy óz ekonomıkasyn qarqyndy damytýǵa májbúrleıdi. «Eger bizge, mysaly, munaı ónimderiniń jetkizilimi toqtatylatyn bolsa, biz olardy ózimiz óndiretin bolamyz»,- dep atap kórsetti Ahmadınejad.
ıAdrolyq baǵdarlamasyn toqtatpaı otyrǵan Tegranǵa qatysty jańa sanktsııalar engizý máselesi búgin, sáýirdiń 9-y kúni BUU shtab-páterinde ótetin «altylyq» kezdesýinde qaralady. Al búgin Iranda - ıAdrolyq tehnologııalardyń ulttyq kúni atap ótiledi.
