Sanktsııa salynǵan taýarlar Qazaqstan arqyly Reseıge jetkizilmes úshin ne istelip jatyr

NUR-SULTAN. QazAqparat - Memlekettik kirister komıteti taýarlardyń ótkizilýin baqylaý sharalary týraly aıtyp berdi, dep habarlaıdy QazAqparat.

Belgili bolǵandaı, naýryz aıynan bastap jekelegen elder Reseı Federatsııasyna sanktsııa salyp, onyń ishinde Reseıge taýarlardyń belgili bir túrlerin jetkizýge tyıym salǵan.

Mundaı taýarlardyń basqa elder arqyly jetkizilgeni anyqtalǵan kezde (sanktsııany aınalyp ótý) mundaı elderge qatysty qaıtalama sanktsııa qoldanylýy múmkin.

Bizdiń negizgi saýda seriktesterimizdiń biri retinde Reseı Federatsııasymen tyǵyz saýda-ekonomıkalyq qatynastardy eskere otyryp, týyndaǵan táýekelderdi eskermeýge bolmaıdy.

Qazaqstandyq ekonomıka úshin zalalǵa jedel den qoıý jáne jol bermeý úshin QR QM Memlekettik kirister komıteti sanktsııalyq tizimderge kiretin taýarlardyń ımporty men eksportyna turaqty monıtorıng júrgizedi.

Atalǵan taýarlardy Qazaqstan Respýblıkasynan Reseı Federatsııasyna áketý kezinde memlekettik kirister organdarynyń elektrondyq shot-faktýrany kýálandyrý tetigi iske qosylǵan, bul taýardyń shyǵarylǵan elin aıqyndaýǵa múmkindik beredi.

Baqylaýdyń bul tetigi kedendik bajdardyń stavkalary EAEO Biryńǵaı keden tarıfinde belgilengennen tómen nemese «alyp qoıý taýarlary» dep atalatyn Qazaqstan Respýblıkasynyń aýmaǵynan taýarlardy áketýge jol bermeý maqsatynda Eýrazııalyq ekonomıkalyq odaqtyń kedendik aýmaǵyna taýarlardy ákelý men olardyń aınalymynyń keıbir máseleleri týraly hattama (Býrabaı hattamasy) sheńberinde de qoldanylady.

Máselen, qańtar-mamyr aılarynda Reseı Federatsııasymen taýar aınalymy ótken jyldyń sáıkes kezeńimen salystyrǵanda aıtarlyqtaı aýytqý kórsetken joq.

Bul rette tabıǵı ýran, bolattan jasalǵan tutas taptamaly dóńgelekter jáne dızel otyny sııaqty jekelegen taýar pozıtsııalary boıynsha, ıaǵnı eksport úshin dástúrli bolyp tabylatyn qazaqstandyq óndiristiń taýarlary boıynsha, onyń ishinde Reseı Federatsııasyna eksporttyń ósýi baıqalady.

Osylaısha, taýarlardyń jekelegen toptarynyń Reseı Federatsııasyna eksportynyń ósýine qaramastan, sanktsııalyq tizimge kiretin taýarlardy Qazaqstan arqyly keri eksporttaý faktileri baıqalmaıdy.