Sanıtarlyq talaptardy saqtamaıtyn saýda oryndary anyqtaldy - Óskemen
ÓSKEMEN. QazAqparat – Óskemen qalasynda sanıtarlyq talaptardyń saqtalýyn tekserý maqsatynda arnaıy qurylǵan mobıldi top saýda oryndary men qyzmet kórsetý nysandaryna kezekti reıd júrgizdi, dep habarlaıdy QazAqparat tilshisi.
Oblystyq Taýarlar men kórsetiletin qyzmetterdiń sapasy men qaýipsizdigin baqylaý departamentiniń uıymdastyrýymen ótken shara barysynda shahardaǵy dúkender, dámhanalar jáne shashtarazdar tekserildi. Ókinishke qaraı, koronavırýs pandemııasyna baılanysty ShQO memlekettik bas sanıtarlyq dárigeriniń qaýlysynda bekitilgen talaptarǵa baǵynbaıtyn mekemeler az bolǵan joq. Kóp jaǵdaıda jeke qorǵanys quraldarynyń bolmaǵandyǵy, sondaǵy qyzmetkerlerdiń medıtsınalyq maska taqpaıtyndyǵy, áleýmettik ara qashyqtyqtyń saqtalmaıtyndyǵy anyqtalǵan.
«Qaýipti indet boıynsha qazir Óskemendegi jaǵdaı turaqty bolǵanymen, vırýs juqtyryp jatqandar áli de bar. Shaǵyn jáne orta bıznes ıelerin tekserý arqyly biz derttiń taralýyna tosqaýyl qoıamyz. Sebebi osyndaı jerlerde adam kóp shoǵyrlanady. Jalpy reıdter únemi ótkizilip otyrady. Qalalyq kásipkerlik bóliminiń mamandary da tekserý sharalaryna atsalysýda. Koronavırýstyń qaýpi jaıly talaı márte aıtylsa da shekteýlerdi saqtamaıtyndar barshylyq. Sondyqtan biz mekeme basshylaryna tek eskertý jasap qoımaı, ákimshilik hattama toltyrýdy bastadyq», – dedi monıtorıngtik toptyń basshysy Mıhaıl Derıabın.
Reıd barysynda sanıtarlyq normalardy buzǵan birqatar dámhana ıesine QR QK-niń 462-baby 3-bóligine sáıkes hattama toltyryldy. Zań boıynsha olarǵa 100 AEK mólsherinde aıyppul salynýy múmkin. Al eskertý jasalǵan kásipkerler kemshilikterdi túzetpese, birden tıisti sharalar qabyldanady.
Al osynyń aldyndaǵy reıd 6-8 maýsym aralyǵynda ótken bolatyn. Ol kezde 200-ge jýyq mekemege tekserilip, 62 zańbuzýshylyq anyqtalǵan.
