Sanıtarlyq normany saqtaý klıent qaýipsizdigi úshin kerek - Elorda ákiminiń kásipkerlerge úndeýi
NUR-SULTAN. QazAqparat – Elorda ákimi Altaı Kólginov úsh másele boıynsha qaladaǵy kásipkerlerge úndeý joldady, dep habarlaıdy QazAqparat tilshisi.
Elorda ákimi Altaı Kólginov saýda jáne oıyn-saýyq ortalyqtarynyń, saýda úıleriniń, bazarlardyń, fıtnes-ortalyqtardyń basshylarymen nysandardaǵy qatań sanıtarlyq normalardyń saqtalýy jáne karantın sharalaryn jeńildetý týraly onlaın keńes ótkizdi.
Qalanyń bas sanıtarlyq dárigeri Aıgúl Shaǵaltaeva qatań karantın engizilgen 5 shildeden bastap kásiporyndardan shamamen 73 mıllıon teńgege sanıtarlyq normalardy saqtamaýǵa qatysty 800 fakti anyqtalǵanyn atap ótti.
«Birqatar nysan jumysyn qaıta bastaǵaly ekinshi apta boldy. Qazir biz vırýstyń áli joıylmaǵanyn túsinýimiz kerek. JRVI maýsymy aldynda koronavırýsqa qatysty ahýaldy qadaǵalaý qajet. Alǵashqy karantın tájirıbesine súıenip, qatelik jibermeý kerek. Ol úshin nysandarda qatań sanıtarlyq-epıdemıologııalyq normalardy saqtaý qajet.
Birinshi. Tıisti oryndarǵa statsıonarlyq teplovızor ornatý usynylady, bul 30-40 kelýshiniń dene qyzýyn birden ólsheýge, adamdar aǵymyn tıimdi basqarýǵa múmkindik beredi. Sonymen qatar bul qyzmetkerlerdiń ózderin de qorǵaıdy – ár kelgen adamǵa jeke mán berý jáne temperatýrany ólsheý qajet bolmaıdy. Pandemııa bastalǵaly beri biz osyndaı teplovızordy qalalyq emhanalarǵa ornattyq. Sondaı-aq jeldetý júıesiniń úzdiksiz jumys isteýin qamtamasyz etý qajet, barlyq jerde áleýmettik qashyqtyq belgisi, sanıtaızer bolýy kerek, maskasyz kirýge tyıym salynady.
Ekinshi. Sanıtarlyq normalardyń buzylýyn anyqtaý boıynsha reıd turaqty negizde júrgiziledi. Bul sharalar qaýipsizdikti jaqsartady. Reıd barysynda «Artem» jáne «Big Shanhaı» bazarlarynda eskertý jasaldy. Olarǵa aıyppul salyndy. Sanıtarlyq normany ákimdik, ınspektorlar úshin emes, klıentińizdiń, azamattardyń qaýipsizdigi úshin saqtaý kerek ekenin este ustaǵan jón. Endi biz COVID-19 sharttaryn qabyl alyp, jańa jaǵdaıǵa beıimdelýge májbúrmiz. Eger ár basshy sanıtarlyq normalardyń saqtalýyna jaýapkershilikpen qarasa, onda búkil ujym da jaýaptylyq tanytady. Bul kelýshiler qaýipsizdigi de qamtamasyz etiledi degen sóz.
Úshinshi. Fıtnes ortalyqtary ókilderiniń usynysyn eskere otyryp, biz jumys ýaqytyn 21: 00-ge deıin sozdyq (buryn 17:00-ge deıin bolǵan). Bul basshylyqtyń klıentter aǵynyn ýaqytyly saralaı alýy úshin jasalady. Sondaı-aq bir mezgilde kelýshiler kóp bolmaýy jáne tar dáliz qurylmaýy úshin basqa saýda nysandaryndaǵy jumys ýaqytyn sozý joldaryn qarastyramyz», – dep túıindedi sózin elorda ákimi Altaı Kólginov.
Onlaın jınalysta kásipkerler kótergen birqatar máseleler sheshimin taýyp, qalǵany jumysqa alyndy.
