Sanıtarlyq normalarǵa sáıkes kelmeıtin azyq-túlik ónimderi anyqtaldy
ASTANA. 25 shilde. QazAqparat /Rýslan Ǵabbasov/ - Indýstrııa jáne jańa tehnologııalar mınıstrliginiń Tehnıkalyq retteý jáne metrologııa komıteti bıylǵy jartyjyldyqta azyq-túlik salasyndaǵy kásiporyndarǵa 585 tekseris júrgizip, sonyń nátıjesinde 371 zań buzýshylyqty anyqtady.
Bul týraly búgin Astanada bolǵan baspasóz máslıhatynda QR Memlekettik standarty Monıtorıng jáne taldaý memlekettik qadaǵalaý basqarmasynyń bastyǵy Ashat Hasenov aıtty.
Onyń sózine qaraǵanda, atalǵan tekserý barysynda sanıtarlyq normalarǵa sáıkes kelmeıtin ónimder anyqtaldy. Máselen, Aqmola oblysyndaǵy ónim satatyn oryndardyń birinde reseılik óndiristiń arpa botqasynda joǵary quramda qalaıy elementi anyqtaldy. Sonymen qatar Shyǵys Qazaqstan oblysynda satylǵan shaı óniminde myshıak tabyldy.
Munymen qosa, mıkrobıologııalyq kórsetkishter boıynsha tıisti talaptarǵa saı kelmeıtin ónimdi (konservilik ónimder, ıaǵnı buqtyrylǵan sıyr eti, reseılik óndiristiń buqtyrylǵan shoshqa eti) satýdyń kóptegen faktileri belgili boldy. Qyrǵyzstanda óndirilgen sary maıda ishek taıaqshasy tobyndaǵy bakterııalar, al Ózbekstannan jetkizilgen qarbyzdarda nıtrattardyń joǵary quramy tabyldy.
«Bul ónimderdiń talapqa sáıkes kelmeýi tasymaldaýdyń jáne saqtaý jaǵdaıynyń durys saqtalmaýynan oryn alyp otyr. Atap aıtqanda barlyq tıisti sharalar qabyldandy. Óndirýshiler men tasymaldaýshylarǵa tıisti eskertý hattary jiberilip, olarǵa qatysty ákimshilik turǵydaǵy sharalar qabyldandy»,-dedi basqarma bastyǵy.
A. Hasenovtyń aıtýynsha, otandyq kásiporyndardaǵy ónimdi óndirý jáne saqtaýda óreskel zań buzýshylyqtar anyqtalmady.
